FERWAFA: Abega yahaye ububasha De Gaulle

Mu masaha ya saa sita zo kuri uyu wa 07 Mutarama, Celestin Ntagungira uzwi cyane nka Abega, umuyobozi ucyuye igihe w’ishyirahamwe ry’umupira w’amaguru mu Rwanda (FERWAFA), yahaye ububasha bwo kuyobora umupira w’amaguru mu Rwanda umuyobozi uheruka gutorwa Nzamwita Vicent de Gaulle.

Mu muhango mugufi wabayeho, Abega yongeye gushimangira ko azaba hafi De Gaulle mu kazi ke mu gihe azaba amukeneye, yaba kumuha inama cyangwa ubundi bufasha azakenera.

Iyi mirimo Nzamwita atangiye yemeza ko ikomeye, ati “ Ni urugamba runini ni akazi gakomeye ariko dufatanyiije hamwe twabasha kuzamura umupira w’u Rwanda.”

Amadeni yasanzemo ngo ntabwo ari amadeni yafashwe na komite asimbuye ahubwo ni amadeni iyo komite nayo yasanze. Ayo madeni ati “Si amadeni macye ariko si na menshi cyane.” Cyane ko ngo harimo amadeni FERWAFA afitiye ibigo n’ayo ibigo bifitiye FERWAFA.

Abajijwe ibimushimishije yasanze muri FERWAFA, Nzamwita yavuze ko ikimushimishije cya mbere ari uko komite icyuye igihe yatangiye kwishyura amadeni, icya kabiri ngo ni imishinga myinshi myiza yo guteza imbere umupira basigiwe na comite icyuye igihe.

Muri iyo mishinga yavuzemo ibikorwa remezo (infrastructures) bihari n’ibiri kubakwa, ibitaro byo kuvura abakinnyi, ubufatanye na St Etienne izajya yohereza abascouts mu Rwanda, imibanire hagati ya Abega na FIFA bazayikomerezaho, ikibuga (syntetique) kizubakwa mu burasirazuba n’ibindi bikorwa ngo komite ye izubakiraho.

Uyu muyobozi mushya yavuze ko mu byo azibandaho harimo cyane cyane guteza imbere umupira w’amaguru mu bana.

Nzamwita Vicent de Gaulle nyuma yo gutorwa atunguranye mu itangazamakuru ry’imikino, yaje kwemeza ko abona abanyamakuru nabo bakeneye amahugurwa ngo kuko batagitangaza amakuru uko bikwiye, ndetse ko abona bakeneye amahugurwa, aha yavugaga ko atacyumva amaradio mu gihe cy’urubuga rw’imikino.

JD Inzaghi Nsengiyumva
ububiko.umusekehost.com