Bane bahoze mu nzirabwoba bazajurira muri Gicurasi

Kuva ku itariki ya 7 kugera kuya 10 Gicurasi, Uregereko rw’ubujurire rw’Urukiko mpuzamahanga mpanabyaha rwashyirewe u Rwanda rukorera Arusha muri Tanzaniya ruzatangira kumva uruhande rw’ubushinjacyaha bujurira ibihano byahawe abasirikare bakuru bahoze mu gisirikare cy’u Rwanda (FAR) cyari kizwi ku izina ry’inzirabwoba.

Uretse uruhande rw’ubushinjacyaha bwajuriye, n’abahawe ibihano nabo ntibanyuzwe n’ibihano bahawe kuwa 17 Gicurasi 2011 bahitamo kujurira; abajuririye ibihano bahawe ndetse bazumva n’urwo rugereko ni Gen BEM Augustin Bizimungu, Gen BEM Augustin Ndindiliyimana, Major François-Xavier Nzuwonemeye na Capt Innocent Sagahutu, nk’uko Ibiro Ntaramakuru Fondation Hirondelle byabitangaje.

Gen Augustin Bizimungu wari umugaba mukuru w’ingabo z’u Rwanda (FAR) mu gihe cya Jenoside yakorewe Abatutsi muri Mata 1994 yakatiwe gufungwa imyaka 30, naho Gen Augustin Ndindiliyimana wari ukuriye gendarmerie akatirwa gufungwa imyaka 11 ingana n’iyo yari amaze muri gereza; yahise arekurwa ariko akomeza kuguma mu nzu z’Urukiko mpanabyaha ziri Arusha ariko nawe ngo azagaraga imbere y’uru rukiko rw’ubujurire.

Ubwo aba bajenerari babiri bakatirwaga bari hamwe na Major François-Xavier Nzuwonemeye wari ukuriye umutwe ushinzwe ubutasi bwa gisirikare na Captain Innocent Sagahutu wari umwungirije. Bakatiwe gufungwa imyaka 20 umwe umwe.

Ubwo aba bagabo bose uko ari bane bakatirwaga, ubushinjacyaha w’Urukiko wa ICTR bwahise bujurira buvuga ko ibihano bakatiwe bidakwiye; none ubujurire bugiye kujya mu mizi.

Gen Bizimungu na Ndindiliyimana bantu ki?

Gen Bizimungu yavukiye i Byumba ku itariki ya 28 Kanama 1952. Yabaye umugaba Mukuru w’Ingabo z’u Rwanda kuwa 16 Mata 1994, asimbuye Marcel Gatsinzi (yari ufite ipeti rya General de Brigade) wari waragizwe Umugaba Mukuru w’Ingabo z’u Rwanda nyuma y’urupfu rwa General BEM Castar Nsabimana Deogratias waguye mu mpanuka y’indege yahitanye Perezida w’u Burundi Cyprien Ntaryamira na General Major Habyarimana Yuvenali wari perezida w’u Rwanda. Uyu General Bizimungu yigeze no kuba Komanda wa Military Police.

Uyu mugabo ngo ntiyigeze amenyakana cyane nyuma y’amashuri makuru ya gisirikare ku rwego rwa Kaminuza, ariko ngo yamenyekanye ubwo yoherezwaga kuba umuyobozi w’ibikorwa bya gisirikare mu yahoze ari Perefegitura Ruhengeri, aho yagiye yigaragaza mu bitero bitandukanye yayoboraga.

General Augustin Bizimungu yatawe muri yombi mu mwaka w’2000 afatiwe muri Angola, aho yari ayoboye umutwe w’abacancuro ba Ex-FAR barwaniraga inyeshyanmba za UNITA; ashyikirizwa urukiko rwa Arusha kuwa 21 Kanama uwo mwaka, aregwa kugira uruhare rukomeye muri Jenoside n’ibyaha byibasiye inyokomuntu byakozwe n’ingabo yari abereye umugaba mukuru.

General Augustin Ndindiliyimana yavutse mu 1943 avukira mu yitwaga Komini Nyaruhengeri, mu yahoze ari Perefegitura ya Butare(ubu ni Ntara y’Amajyepfo). Yakoze imirimo inyuranye y’igisirikare mu myaka isaga 20. Yize amashuri y’intambara mu Bubiligi no mu Budage aho yigeze no kuba ambasaderi.

Yabaye Minisitiri w’Urubyiruko n’Amakoperative (MIJECOP) nyuma ayobora Minisiteri y’Urubyiruko n’amashyirahamwe (MIJEUMA), mbere yo gusubizwa mu buyobozi bukuru bw’ingabo (Etat Major). Ngo ntiyakunze kujya ku rugamba, ariko muri Etat Major yakoraga ibikorwa byo guhuza (coordination) urugamba no kumenya ahakenewe imbaraga n’ibikoresho byinshi kurenza ahandi. Yagizwe Umugaba Mukuru wa gendarmerie nationale ku itariki ya 02 Nzeli 1992. Yafatiwe mu Bubiligi mu mwaka w’2000.

UBWANDITSI
UM– USEKE.COM