DJ Danny, umunyarwanda wigaragaje mu kuvanga muzika mu Buhinde

East-coast Music Festival ahitwa Pondicherry muri Leta ya Tamil Nadu mu burasirazuba bw’Ubuhinde yabaye kuwa 20 Nzeri 2014 ihuza aba DJs bakomeye muri ako karere barimo n’uzwi cyane mu Buhinde; Dj Akhil Talreja, bwa mbere muri iki gitaramo hagaragayemo umu DJ w’umunyafrica, uyu ni umunyarwanda DJ Danny.

Danny Manishimwe (DJ Danny) ni umunyeshuri w’umunyarwanda wiga muri iki gihugu ariko unafite impano n’ubuhanga mu kuvanga muzika.

Iyi Festival iba mu bice bitandukanye by’Ubuhinde, aha muri Pondicherry yari yahuriyemo abaDJ bakomeye muri ako gace k’uburasirazuba bw’igihugu cy’Ubuhinde nka; DJ wa mbere muri Mumbai unazwi cyane mu Buhinde Dj Akhil Talreja, Dj Shamnas, Dj Dark Hunter, Dj Bobby, Dj Eli.

DJ Danny yabwiye Umuseke ko muri iki gitaramo, cyane cyane cy’abaDJ berekana impano zabo mu gushimisha abantu, yavanze imwe mu miziki y’abahanzi bo mu Rwanda nka Riderman, King James na Urban Boys ngo bakayikunda cyane n’ubwo batumvaga ururimi iririmbyemo. Ndetse ngo bamwe mu bari aho bamubwiye ko yabumvishije imiziki myiza y’abahanzi b’iwabo.

Muri iki gitaramo aba ba DJ bagaragaje ubuhanga bwabo mu kuvanga muzika ya AfroBeat, HipHop na Dancehall

Ibijyanye no kuvanga muzika (DJing) ntabwo ari ibintu bimenyerewe cyane mu Rwanda, benshi mu rubyiruko hari abibaza ko ari umwuga wagenewe abanyamahanga, ariko hari ab’inkwakuzi mu rubyiruko rw’u Rwanda basingiriye uyu mwuga bawukora ukabatunga ahantu hatandukanye.

DJ Danny ni umwe mu bari gukora azamura impano ye ariko atanibagiwe amasomo yamujyanye nk’uko abivuga.

UM– USEKE.RW