Zaza: IPRC East n’abaturage bubakiye abirukanywe muri Tanzaniya

Mu gikorwa cy’umuganda wakorewe mu karere ka Ngoma kuya 30 Kanama 2014, abakozi n’abanyeshuri bo mu Ishuri rikuru ryigisha imyuga n’ubumenyingiro mu ntara y’Iburasirazuba (IPRC East), bafatanyije n’abaturage kubakira Abanyarwanda birukanywe muri Tanzaniya bagifite ikibazo cyo kutagira inzu zo guturamo.

Icyi gikorwa cyabereye mu murenge wa Zaza, akagari ka Ruhinga, kikaba cyaritabiriwe n’ubuyobozi bw’akarere, abakozi n’abanyeshuri ba IPRC East, abahagarariye polisi ndetse n’abaturage

Muri icyo gikorwa hazamuwe inzu eshanu zigezwa hagati ndetse hanakorwa imisingi ku zindi nzu ebyiri. Ubuyobozi bw’akarere buteganya ko izo nzu zose zizaba zarangiye kubakwa muri uku kwezi kwa Nzeri.

Habimana Kizito, umuyobozi wa IPRC East wungirije ushinzwe ubutegetsi n’imari yasabye abaturage gushyira hamwe kugira ngo Abanyarwanda birukanywe muri Tanzaniya badasigara inyuma mu iterambere.

Habimana ati ”Aba Banyarwanda birukanywe batategujwe kandi bagomba gutera imbere vuba nk’abandi Banyarwanda, tugomba guhuza imbaraga kugira ngo tubafashe muri urwo rugendo kandi dufashe n’igihugu cyacu gukomeza kwihuta mu iterambere.”

Umuyobozi w’akarere wungirije ushinzwe imibereho myiza y’abaturage, Kirenga Providence yasabye abaturage kwihutisha icyo gikorwa cyo kubaka kugira ngo kizarangirane n’uku kwezi kwa Nzeri.

Umuyobozi muri polisi ushinzwe community policing mu karere ka Ngoma yasabye abaturage kurushaho kurwanya ibihungabanya umutekano harimo ibiyobyabwenge, ubujura n’ibindi.

Abanyarwanda birukanywe muri Tanzaniya bageze mu Rwanda bahura n’ibibazo bitandukanye birimo ibyo kutagira inzu zabo zo guturamo. Umuganda ni kimwe mu byifashishwa mu gufasha abo Banyarwanda kubona aho gutura heza.

Ishimwe Theogene

UM– USEKE.RW