Urukiko rwa Arusha rwanzuye kohereza Fulgence Kayishema mu Rwanda

Kuri uyu wa kabiri tariki 28 Gashyantare Urukiko mpuzamahanga rwashyiriweho u Rwanda rukorera Arusha, rwafashe umwanzuro wo kohereza urubanza rwa Fulgence Kayishema kuburanishwa n’inkiko zo mu Rwanda.

Bishingikirije itegeko numero 11 ry’uru rukiko rirwemerera kohereza urubanza ahandi, abacamanza bemeje ko ruriya rubanza rwoherezwa mu nkiko zo mu Rwanda.

Iki cyumba cy’abacamanza cyemeje ko amadosiye (dossier) ashinja Kayishema agomba kugezwa ku mushinjacyaha w’u Rwanda mu minsi 30 uvuye kuri tariki 28 Gashyantare ubwo hafatwaga umwanzuro.

Kayishema wahoze ari umugenzacyaha w’igipolisi mu cyahoze ari komini Kivumu ya Kibuye, arashinjwa uruhare rutaziguye muri Genocide yakorewe abatutsi mu 1994, ibyaha byibasiye inyoko muntu no gutanga amabwiriza y’ubwicanyi bwakorewe i Nyange mu burengerazuba bw’u Rwanda.

Uyu mwanzuro wo kohereza Kayishema mu Rwanda ubaye uwa kabiri ufashwe n’uru rukiko nyuma y’uwari wafashwe muri Kanama umwaka ushize wo kohereza Jean  Uwinkindi.

Iyoherezwa rya Pasitoro  Uwinkindi  ryo rikaba ryahagaritswe by’abagateganyo n’uru rukiko kuri uyu wa kabiri, nyuma yo kutumvikana hagati y’Urukiko rwa Arusha n’akanama nyafurika k’uburenganzira bwa Muntu.

Fulgence Kayishema kugeza ubu akaba ataratabwa muri yombi kuko akiri mu bwihisho. Guverinoma ya America (US) yashyizeho igihembo cya miliyoni 5 US$ ku muntu uzatanga amakuru yageza ku ifatwa rya Fulgence Kayishema w’imyaka 52.

Jean Paul Gashumba
UM– USEKE.COM