Urubyiruko rw'ADEPR mu bikorwa byo kubaka igihugu n'itorero

Urubyiruko rwo mu rurembo rw’umujyi wa Kigali mu itorero rya ADERP guhera kuwa Gatandatu tariki ya 10 Gicurasi ruri gukora ibitaramo bitandukanye bijyana n’bikorwa by’ingirakamaro birimo gukangurira abantu kwipimisha agakoko gatera SIDA no kurwanya ibiyobyabwenge, mu  nsanganyamatsiko  igira iti “Uruhare rw’urubyiruko mu kwiyubaka,  kubaka igihugu n’itorero.”

Ibi biterane biri gukorwa bishingiye ku ntego y’ijambo ryo muri Bibiliya rigira riti “Yesu ni we mucyo wacu”  riboneka muri Yesaya 60:1; na Yohana 1:4, bizaba mu gihe cy’icyumweru cyose, aho ku ikubitiro kuri uyu wa gatandatu byatangirijwe ku nyubako za ADEPR ku Gisozi, bibimburiwe no gusura urwibutso rwa Jenoside rwa Kigali, ngo birebere amateka mabi yaranze igihugu, ndetse bafatire hamwe umugambi wo kuyahindura nk’urubyiruko rw’abakirisitu.

Iki gikorwa cyakomereje mu karere ka Gasabo aho ku cyumweru tariki 11 Gicurasi 2014 kuri paruwasi ya Gahanga hakorewe igikorwa cyo gufasha abarokotse Jenoside yakorewe Abatutsi nbatishoboye babaremera, banabaha ubwisungane mu buzuzi, gikurikirwa n’igiterane cyo guhimbaza Imana.

Umuyobozi ushinzwe urubyiruko rwa ADEPR rwo mu Karere ka Gasabo, witwa Abel yatangarije Umuseke uko iyi gahunda y’igiterane izakomeza kugeza isojwe.

Yavuze ko ku itariki ya 13 Gicurasi 2014 iki giterane kizakomereza mu karere ka Nyarugenge guhera ku isaha ya saa munani muri paruwasi ya Nyakabanda, aho kizabimburirwa n’ ikiganiro kijyanye no kurwanya ibiyobyabwenge kizatangira ku isaha ya saa tatu z’igitondo.

Ku masaha nk’ayo kandi, tariki ya 15 Gicurasi 2014 muri Paruwasi ya Kicukiro, niho kizakomereza kibimburirwe n’ igikorwa cyo kwipimisha ku bushake agakoko gatera SIDA guhera bizatangira ku isaha ya saa tatu z’igitondo.

Iki giterane cy’urubyiruko nyuma yo kuzenguruka uturere tw’umujyi wa Kigali, Abel atangariza ko kizasorezwa ku nyubako za ADEPR ku Gisozi tariki 17 Gicurasi 2014, kandi akangurira urubyiruko rwa ADEPR ndetse n’urundi rubyiruko rw’abakirisitu kuzacyitabira kuko kizabafasha gutera imbere mu buryo bw’umwuka.

Roger Marc Rutindukanamurego
ububiko.umusekehost.com