UK: Abanyarwanda batangije ibikorwa bitegura Kwibuka ku nshuro ya 20

Kuri uyu wa kabiri tariki ya 7 Mutarama 2014, mu Bwongereza mu Mujyi wa Coventry, ihuriro ry’Abanyarwanda baba muri  West Midland-Rwandese Community Association , mu Bwongereza batangije ibikorwa bitegura kwibuka Jenoside yakorewe Abatutsi ku nshuro ya 20.

Muri ibi bikorwa hacanywe urumuri rutazima rugomba kuzenguruka igihugu cy’Ubwongereza ahaba abanyarwanda benshi rukazabageraho i Birmingham kuwa 12 Mata 2014, ahazacanwa urumuri rw’icyizere ku munsi nyirizina uzatangiza  Kwibuka ku nshuro ya 20 mu Bwongereza bwose.

Ibi bikorwa byatangiriye i Coventry muri West Midland bitangizwa n’ihuriro ry’abanyarwanda rya ‘ West Midland Rwandese Community Association {WM-RCA}’  bizarangwa n’ibiganiro, kuvuga ku mateka yaranze Jenoside muri Mata 1994 hanerekanwe na filime zitandukanye zivuga kuri Jenoside.

Hateguwe kandi  ibikorwa bitegura kwibuka hirya no hino mu migi itandukanye yo mu gice cya Midland ibikorwa bizabera muri za Kaminuza zitandukanye zo muri ako karere nka Birmingham University, Coventry University,University of Warwick, ndetse no gutanga ubutumwa bw’icyizere.

Umuyobozi mukuru wa WM-RCA, Bosco Ngabonzima, yasobanuye ko “Urumuri Rutazima” ari urumuri rwo kwibuka abazize Jenoside, ndetse n’ubutwari no kwigira Abanyarwanda bagaragaje mu myaka 20 ishize haba mu Rwanda ndetse naho batuye mu mahanga.

Bosco Ngabonzima yashimangiye kokwibuka  ku nshuro 20 ari umwanya wo gusubiza amaso inyuma ku rugendo Abanyarwanda bakoze mu myaka 20 ishize.

Yavuze ko ibi bikorwa byongera guha icyubahiroabishwe kandi bigafasha gukura isomo mu byabaye kugira ngo bitazongera kubaho.

Ati “tugomba kugira ubumwe bugararagaza ugukomeza umutsi n’ubushake bw’Abanyarwanda mu kongera kubaka igihugu cyacu giha amahirwe umuturarwanda wese aho ava akagera”

Uyu muyobozi yavuze ko ibi byose  byashobotse kubera ubuyobozi bwiza.

Urumuri rw’icyizere rukaba rugaragarira mu maboko ndetse n’ubushatse bw’urubyiruko mu kongera kubaka Rwanda rushya.

Umwaka wa 2014 uzarangwa no kwibuka ku nshuro ya 20  Jenoside yakorewe Abatutsi, kwifatanya n’abacitse k’icumu, ndetse no gushyirahamwe hagamijwe ko amateka nk’aya atazongera kubaho ukundi,yaba mu Rwanda cyangwa ahandi hose.

Ibyo bikorwa bikaba bizakomeza kandi mu bice bitandukanye bya Midland cyane cyane mu mashuri ndetse na za Kaminuza kuzageza ku munsi wo kwibuka muri UK yose i Birmingham kuwa 12 Mata 2014.

West Midland ni igice cyo hagati mu Ubwongereza kigana mu burengerazuba, kigizwe n’uduce tundi tuzwi nka Wolverhampton, Dudley, Sandwell, Solihull, Birmingham, Coventry, Walsall ndetse n’imijyi izwi cyane ya Wolverhampton, Birmingham na Coventry ari naho habereye uyu muhango.

ububiko.umusekehost.com