Shampiyona irasubukurwa mu minsi itanu nyuma ya CHAN

Nyuma y’amezi atatu idakinwa, shampiyona y’u Rwanda y’umupira w’amaguru AZAM Premier League igiye gusubukurwa. Izatangira mu minsi itanu nyuma y’umukino wa nyuma wa CHAN 2016, iri kubera mu Rwanda. Amakipe amwe nka Mukura VS azaba aryoherwa no gukinira kuri stade yayo yaherukagaho mu myaka itanu ishize.

Shampiyona yaherukaga gukinwa mu Ugushyingo 2015, ubwo ikipe y’igihugu Amavubi yiteguraga gukina na Libya mu gushaka tike y’igikombe cy’isi cya 2018.

Nyuma yo gusezererwa, Amavubi yakomereje muri CECAFA y’ibihugu yabereye muri Ethiopia, aho yaje gutsindirwa ku mukino wa nyuma na Uganda Cranes.

Nyuma ya CECAFA, ubuyobozi bw’umupira w’amaguru mu Rwanda bwahisemo ko Amavubi yakomeza umwiherero bitegura CHAN yaburaga iminsi micye ngo itangire.

Izi nizo gahunda zitandukanye zatumye shampiyona y’imbere mu gihugu imara amezi atatu idakinwa.

Nyuma yo gusezererwa kw’Amavubi muri 1/4 cya CHAN2016, shampiyona y’icyiciro cya mbere izasubukurwa guhera tariki ya 12 Gashyantare ahazaba hakinwa imikino y’umunsi wa 10, kuko yasubitswe bamaze gukina imikino y’umunsi wa cyenda.

Ikipe nka Mukura Victory Sports yo izaba yishimira kongera gukinira umukino kuri stade yayo Huye yaherukaga gukiniraho shampionat muri Mata muri 2011. Kuri iyi nshuro ikazakira mukeba wo mu Amajyepfo, Amagaju FC y’i Nyamagabe mu Bufundu bwari ubw’umutware Rutaremara.

AS Kigali nayo izaba yongera kwakirira imikino kuri stade Nyamirambo ivuguruye, cyo kimwe na Etincelles izakirira Musanze FC kuri stade Umuganda nayo imeze neza kurushaho.

APR FC na Police FC zizahagararira u Rwanda mu mikino ya CAF, zo zizakina hagati mu cyumweru kizakurikiraho, bitewe n’uko shampiyona izasubukurwa mu mpera z’icyumweru bazakinamo iyi mikino mpuzamahanga.

Tariki 13 Gashyantare 2016 nibwo Police FC izakira Atlabara yo muri Sudani y’epfo muri CAF Confederations Cup, kuri iyo tariki  APR FC yo izasuura Mbabane Swallows yo muri Swaziland muri CAF Champions League.

Uko amakipe azahura ku munsi wa 10 wa shampiyona

Tariki ya 12 Gashyantare

• Sunrise Fc vs Bugesera Fc (Rwamagana)
• AS Kigali vs Marines Fc (Stade de Kigali)
• Gicumbi Fc vs Rayon Sports (Gicumbi)
• Etincelles Fc vs Musanze Fc (Umuganda)
• AS Muhanga vs Rwamagana City Fc (Muhanga)

Tariki ya 14 Gashyantare:
Mukura VS vs Amagaju (Huye)

Tariki ya 17 Gashyantare
Police FC vs Espoir FC (Kicukiro)

Tariki ya 20 Gashyantare
Kiyovu vs APR FC (Stade de Kigali)

Roben NGABO
UM– USEKE.RW