Robert Ndatimana afunze aregwa gutera inda umwana

Robert Ndatimana umukinnyi wa Police FC kuwa gatanu w’iki cyumweru kirangiye yafashwe n’ubugenzacyaha bwa Police y’u Rwanda akurimiranyweho gutera inda umwana w’umukobwa w’imyaka 16. Kugeza kuri iki cyumweru akaba yari agifungiye kuri station ya Police i Nyamirambo.

Amakuru agera k’Umuseke yemeza ko uyu mukinnyi yafatiwe ku myitozo y’ikipe ye ajya gufungirwa kuri station ya Police i Nyamirambo.

CIP Jean de Dieu Mayira umuvugizi w’ikipe ya Police FC yabwiye Umuseke ko koko uyu mukinnyi afunze akekwaho iyo myitwarire idakwiye. Akaba ari mu maboko y’ubutabera kugeza ubwo iyi nkuru yandikwaga.

Robert Ndatimana w’ikigero cy’imyaka 22 yamenyekaniye mu ikipe y’igihugu y’abatarengeje imyaka 17 bakinnyi igikombe cy’isi muri Mexico. Nyuma akina mu makipe ya Isonga FC na Rayon Sport mbere yo kuza muri Police FC mu kwa munani uyu mwaka. Ndetse akaba yaranahamagawe mu ikipe y’Amavubi nkuru.

CIP Mayira ati “Byarambabaje kuba mu ikipe y’urwego rushinzwe kurwanya ibyaha hagaragara ikibazo nka kiriya. Gusa nk’uko dusanzwe tubikora turakomeza gushishikariza abakinnyi kwitwararika no kugira indangagaciro zikwiye umunyarwanda.”

Amakuru agera k’Umuseke avuga ko Ndatimana yerezwe n’ababyeyi b’umwana nyuma y’uko ababwiye ko uyu musore yamuteye inda kandi akamwihakana. Bivugwa kandi uyu musore ukekwaho ukekwaho gutera inda nawe abihakana kugeza ubu.

Ingingo ya 190 mu gitabo cy’amategeko ahana y’u Rwanda iteganya igihano gishobora kugera ku myaka 28 y’igifungo ku muntu mukuru wateye inda umwana.

Jean Paul Nkundineza
UM– USEKE.RW