Indwara y’iseru yibasiye intara 5

RDC: Guverinoma iremeza igaragara ry’indwara y’iseru mu ntara eshanu

Muri Repubulika iharanira demokarasi ya Kongo haravugwa indwara y’iseru yibasiye intara zigera kuri eshanu biturutse ku kuba ngo hashize imyaka ibiri muri iki gihugu badatanze urukingo rw’iyi ndwara.

Inkuru dukesha radio Okapi ivuga ko mu kiganiro n’abanyamakuru kuri uyu wa gatandatu minisitiri w’ubuzima Victor Makwenge yayitangarije ko ngo cas 21000 z’iyi ndwara ari zo zimaze kugaragara mu ntara eshanu ari zo Katanga, Kasaï y’uburengerazuba n’iyi burasirazuba, Maniema hamwe n’intara ya Kivu y’amajyepfo.

Aha minisitiri Makwenge akaba yaraboneyeho guhamagarira abaturage b’iki gihugu kuzitabira urukingo rw’iyi ndwara ruzatangwa hagati y’italiki ya 17 -21 uku kwezi

Ibi akaba abitangaje nyuma y’uko ukuriye ishyirahamwe ry’abaganga batagira umupaka Médecins sans frontière muri iki gihugu Gaël Hankenne atangarije ko hari impungenge z’uko iyi ndwara yakwibasira intara ya Bandundu ikaba yaba ibaye iya gatandatu yibasiwe n’iyi ndwara muri iki gihugu.

Iyi ndwara ngo ikaba ikomeje gukwirakwira vuba vuba yerekeza mu majyaruguru y’iki gihugu ndetse no mu ntara ya Equateur.

SOLANGE UMURERWA
Umuseke.com