Ngoma: Umuvuzi magendu akurikiranywe guhitana umurwayi

Abavuzi gakondo kimwe n’abandi bavuzi muri rusange iyo bagejejweho umurwayi hakiri kare akunze gukira. Ariko siko byagenze mu Karere ka Ngoma ho mu Murenge wa Sake ,kuko hari umuvuzi gakondo  uri mu maboko ya polisi i Sake, kuva kuri uyu wa mbere aho akurikiranyweho urupfu rw’umurwayi.

Uwo murwayi wari uzwi ku izina rya Habinshuti       yakomokaga mu karere ka Gatsibo,akaba yarageze kuri uwo muvuzi gakondo ku itariki ya 7/Gashyantare/2013  aho yivuzaga uburwayi bwo mu mutwe yari amaranye imyaka igera ku 9.

Ukuriye polisi muri ako Karere CIP Safari Christian yatangaje ko umurambo wa Habinshuti wagejejwe mu bitaro bya kibungo, kugirango bamenye neza icyeteye urupfu rwe. Yatangaje kandi ko uyu muvuzi  atari umuvuzi wemewe nk’umuvuzi gakondo, kuko ubusanzwe abavuzi gakondo bemezwa na Minisiteri y’ubuzima nyuma yo kuzuza ibisabwa. Uyu  akaba  afatwa nka magendu.

Akaba yasoje atangaza ko uyu muvuzi icyaha akurikiranyweho nikimuhama ;azahanishwa igihano giteganywa n’ingingo ya 598 y’igitabo cy’amategeko ahana y’u Rwanda aricyo :”gufungwa  kuva ku mezi 6 kugeza ku myaka 2 , ndetse n’ihazabu y’amafaranga ari hagati ya miliyoni 1 kugeza kuri miliyoni 5”, anakangurira kandi  abaturage kugana abaganga bemewe na Minisiteri y’ubuzima cyangwa bakagana ibitaro mu rwego rwo kwirinda imfu nk’izo.

Roger Marc Rutindukanamurego
UM– USEKE.COM