Nahesheje Rayon shampionat nk’umukinnyi, ndashaka no kubikora ndi umutoza – Masudi Djuma

*Masudi Juma niwe mutoza mushya wa Rayon Sports
*Niyo kipe nkuru ya mbere atoje
*Yayibereye Kapiteni anayihesha igikombe mu 2004
*Aturutse i Burundi aho yari umutoza wungirije mu Intamba ku rugamba y’abato

Rayon sports ifite umutoza mushya. Nubwo ataragira inarararibonye mu gutoza amakipe makuru, Masudi Djuma ahawe inshingano zo gutoza Rayon Sports nk’umutoza mukuru asimbuye Ivan Jacky Minaert werekeje muri AFC Leopards.

Kuri uyu wa gatanu tariki 04 Werurwe 2016 nibwo habaye ikiganiro n’abanyamakuru, uyu mutoza mushya wa Rayon sports yerekanwa, uyu ni umurundi Masudi Djuma yari amaze amezi ane ari umutoza wungirije mu ikipe y’igihugu Intamba ku rugamba y’abato.

Uyu mutoza yabwiye itangazamkuru ko nubwo ataragira inararibonye mu gutoza amakipe makuru, ariko ko azi Rayon sports n’ubuzima bwayo kuko yayikiniye imyaka myinshi.

Ngo yayihesheje igikombe cya shampiyona nk’umukinnyi, none arifuza kubikora nk’umutoza.

Masudi Djuma yagize ati : « Nakiniye Rayon sports imyaka irenga ine mu bihe bitandukanye. Nayihesheje igikombe cya shampiyona ndi kapiteni wayo. Nzi ko intego ya Rayon ihora ari intsinzi, kuko tubisabwa n’imbaga y’abafana bacu. Niyo mpamvu nanifuza kubikora nk’umutoza ».

Muri iki kiganiro n’abanyamakuru abakinnyi Manzi Thirry na kapiteni wa Rayon sports Ndayishimiye Eric Bakame bahamirije itangazamakuru ko bishimiye imikoranire yabo n’uyu mutoza mushya wabo.

Nyuma yo gutangazwa nk’umutoza mushya, Masudi yahise atangaza abakinnyi 11 azakoresha mu mukino uzahuza Rayon sports na Espoir FC kuri uyu wa gatandatu. Muri aba, hagarutse mo rutahizamu Davis Kasirye wari umaze amezi ane adakinira iyi kipe.

11 bazabanzamo ni :

Umunyezamu : Ndayishimiye Eric (bita Bakame)

Ba myugariro : Jean d’Amour Mayor, Manzi Thierry, Munezero Fiston, Emmanuel Imanishimwe

Abo hagati : Mugisha Francois, Mugheni Fabrice, Kwizera Pierrot, Nshiti Dominique Savio, Mugenzi Cedric (bita Ramires)

Rutahizamu : Devis Kasirye

Masudi Djuma yavukiye i Bujumbura mu Burundi mu 1977, yakiniye amakipe atandukanye y’i Burundi, harimo Prince Louis, Inter Star.

Yageze mu Rwanda mu 1998 aje muri APR FC, nyuma yo kuyikinira imyaka ibiri yahise yerekeza Kiyovu Sports.

Yatangiye gukinira Rayon Sports muri 2003 atwara igikombe cya shampiyona muri 2004 ari kapiteni wa Rayon Sports yatozwaga na Kayiranga Baptiste.

Yavuye muri Rayon Sports mu 2004 ajya muri Seychelles, agaruka muri Rayon Sports mu 2006, aho yahakinnye umwaka umwe. Yasoreje umupira mu ikipe ya Inter Stars y’i Burundi mu 2010, atangira inzira y’ubutoza.

Masudi nyuma yo kubona Licences ‘B’ y’ubutoza itangwa na CAF, muri 2013 yahise atangira umwuga wo gutoza umupira w’amaguru.

Yaciye mu makipe nka Inter FC na Inter Star z’i Burundi atoza nk’umutoza wungirije. Muri 2014 – 2015 atoza amakipe y’igihugu y’u Burundi (Intamba mu rugamba) y’abato, nk’umutoza wungirije.

Rayon sports, niyo kipe ya mbere agiye gutoza nk’umutoza mukuru.

Roben NGABO
UM– USEKE.RW