Mutuntu, Umurenge WONYINE wa Karongi udafite amashanyarazi…

 ‘Nta muriro nta terambere’ niko Perezida Paul Kagame yasubije umuyobozi w’Akarere ka Karongi wari umugejejeho imbogamizi z’Umurenge wa Mutuntu udafite amashanyarazi, ubusanzwe utaranAyigeze. Ni igisubizo cyari gikubiyemo ko byihutirwa nk’uko iterambere rikenewe byihutirwa. Umunyamakuru w’Umuseke yasuye uyu murenge wa Mutuntu…

Mu murenge wa Mutuntu ni kure mu cyaro uturutse mu mujyi wa Karongi ugana mu majyepfo, ufata umuhanda ugana mu Gisovu uciye mu murenge wa Rwankuba, ugafata Umurenge wa Twumba ukinjira mu murenge wa Mutuntu kuri centre y’ubucuruzi bita ku Mukungu, ni urugendo rukomeye rw’amasaha arenga gato abiri n’imodoka mu muhanda w’igitaka.

Ukinjira aha ku Mukungu wakwibaza ko hari amashanyarazi kuko insinga ziramanitse, ibiti bizitwara birahari, amazu amwe n’amwe afite insinga z’amashanyrazi n’amatara mu nzu. Nyamara aha hantu nta mashanyarazi ahari hashize imyaka ine. Ayo bahoranye nayo ntiyari ayabo.

Baheruka amashanyarazi bavanaga kuri barrage yubatswe n’abapadiri mbere ya Jenoside ku kagezi ka Mbirurume, barrage yatangaga amashanyarazi yo gukoresha cyane cyane kuri centre de sante ya Mukungu n’inkengero zayo. Ubu iyi barrage yarapfuye hashize imyaka ine, abapadiri bayubatse baragiye, ubuyobozi nabwo ntibwasannye iyi barrage ngo ikomeze gukora birambye, bimwe mu bikoresho byayo byaribwe.

Abaturage bakenera serivisi zinyuranye nk’ibyangombwa (urugero icyangombwa ubundi kishyurwa amafaranga 500) bajya  kubyandikisha ahitwa Twumba hari amashanyarazi ni urugendo rwa moto rubasaba gutanga nibura 5 000Rwf cyangwa se kugenda n’amaguru nubwo ari kure cyane kandi hari imisozi igendetse nabi. Iki cyangombwa cya 500Rwf kikaba cyahagarara umuturage arenga ibihumbi bitanu.

Nta Banki ihari, SACCO ya Mutuntu ikoresha uburyo bwa gakondo, guhemba abakozi buri gihe ni nyuma byatinze kuko bijya gukorerwa ahari amashanyarazi mu birometero bitari munsi ya 25.

Kuri centre ya Mukungu nta wogoshesha imashini y’amashanyarazi, nta basudira ibyuma, nta babaji bafite ibikoresho bikwiriye usibye ibya gakondo. Aha kuri centre hari umuntu ufite ka ‘generateur electrique’ acana kuwa mbere ku munsi w’isoko, icyo gihe nibwo abantu baza gushaka umuriro wa za telephone zabo (battery charging), bakishyura.

Abantu bacye cyane nibo bava nk’i Karongi bakaza bakarara i Mutuntu kuko kuri iyi centre ya Mukungu amacumbi y’abashyitsi yonyine ahari ari kwa Padiri, aha ni ibyumba bitatu gusa, iyo byuzuye ubwo nugutaha cyangwa ugacumbika mu baturanyi, ibi byumba nabyo nta mashanyarazi bifite uharaye (umunyamakuru w’Umuseke yaharaye ijoro ryakeye) acana bougie. Akishyura 2 000Rwf ku ijoro.

Ikizere cyo kuhageza amashanyarazi ni gike

Claude Gaparake ushinzwe irangamimerere muri uyu murenge yabwiye Umuseke ko iyo bakeneye serivisi z’amashanyarazi byihutirwa hari ubwo bajya kuvumba kuri centre de sante ya Mukungu, aha niho honyine hari ‘paneau solaire’. Gusa ngo umuzungu uhayobora akunda kubirukana akababwira ko kuri iki kigo atari kuri MINALOC.

Nyamara mu biro by’Umurenge hari za mudasobwa bahawe ariko zidakora kuko nta mashanyarazi. Bakaba basaba nibura ko  biro y’Umurenge yahabwa za ‘paneau solaire’.

Iterambere risa n’iridashoboka muri uyu murenge mu gihe nta mashanyarazi arahagera nk’uko na Perezida Kagame yabivuze ubwo aheruka gusura abaturage mu Mubuga aha i Karongi.

Damien Dusingizimana ushinzwe REG ku rwego rw’Akarere ka Karongi avuga ko babizi ko Mutuntu ari Umurenge udafite amashanyarazi bigatuma abaturage badatera imbere. Ariko ngo bafite gahunda yo kubaha umuriro uturutse ku musozi wa Karongi ku minara (za Gisovu) gusa nabyo ngo ni ibintu bihenze cyane kuko kuvayo ujya i Mutuntu ari kure cyane.

Photos/S.Ngoboka/Umuseke

Sylvain NGOBOKA
UM– USEKE.RW