Mukura yafashe umwanya wa kabiri nyuma yo gutsindira i Musanze

Kuri uyu wa gatatu shampiyona y’icyiciro cya mbere mu mupira w’amaguru mu Rwanda yakomezaga hakinwa imikino y’umunsi wa 11 hakinwe imikino itatu, muri yo Mukura Victory Sport yatsinze Musanze maze ifata umwanya wa kabiri.

Mukura VS y’umutoza Okoko Godfroid ubu irarusha Rayon Sports inota rimwe, ikarushwa na AS Kigali amanota abiri, ni nyuma yo kuvana amanota atatu i Musanze ihatsindiye igitego 1-0 cya Hakizimana Muhadjiri, wuzuzaga igitego cye cya karindwi muri shampiyona, ubu akaba ayoboye abandi ba rutahizamu.

Mu yindi mikino, Police FC yakiraga ikipe ya Espoir FC ku Kicukiro. Iyi kipe yari imaze amezi atatu itagaragara mu kibuga yatsinzwe na Police FC 3 – 1, Police yari iherutse kandi gutsinda ibi bitego ikipe ya Atlabara mu mikino nyafurika kuwa gatandatu w’icyumweru gishize.

Muri ibi bitego harimo ibitego bibiri bya kapiteni mushya wayo Innocent Habyarimana n’igitego cya Mohammed Mushimiyimana. Mu gihe impozamarira ya Espoir FC yatsinzwe na Tumayine Fiston.

I Rwamagana, Yves Rwasamanzi na Niyibizi  Souleyman batozaga umukino wabo wa mbere muri Kiyovu sports.

Aba baciye mu ikipe y’Isonga FC, batangiye neza kuko bashoboye kuhatsindira ikipe ya Rwamagana City igitego 1-0, cy’umusore Gashugi Abdul Karim.

APR FC n’Amagaju nizo zitakinnye, APR yo iherutse muri Swaziland mu mikino ya Champions League. Iyi kipe ya gisirikare, igomba guhura na Kiyovu Sports mu mukino w’ikirarane kuri uyu wa gatandatu, ikurikizeho Espoir ku wa kabiri w’icyumweru gitaha, naho Amagaju, atakinnye kuri uyu munsi wa 11, azahure na Police FC ku cyumweru.

Uko imikino yose y’umunsi wa 11 yagenze:

Ku wa Kabiri:

• Rayon Sports 0-0 AS Muhanga
• Marines 1-0 Etincelles
• Bugesera 1-1 AS Kigali
• Sunrise 1-1 Gicumbi

Ku wa Gatatu:

• Police 3-1 Espoir
• Rwamagana 0-1 Kiyovu Sports
• Musanze 0-1 Mukura VS

Roben NGABO
UM– USEKE.RW