Mme Jeannette Kagame yahaye abana amata k’Umuganura

Remera – Ku mugoroba wo kuri uyu wa mbere Kanama ubwo kuri stade Amahoro hizihizwaga umunsi w’Umuganura Madame Jeannette Kagame niwe wakoze umuhango wo guha abana amata, umwe mu mihango yakorwaga kuri uyu munsi.

Abantu buzuye stade nto hamwe n’abayobozi barimo Minisitiri Geraldine Mukeshimana w’ubuhinzi n’ubworozi, Minisitiri w’ingabo General James Kabarebe, Serafina Mukantabana w’Ibiza no gucyura impunzi ndetse na Madame Jeannette Kagame wari umushyitsi mukuru.

Minisitiri w’Ubuhinzi n’Ubworozi Mukeshimana Geraldine  yavuze ko umuganura ari urugendo rwo kwigiramo kwihesha agaciro no kwigira.

Asaba abanyarwanda ko mu myaka izaza iki gikorwa buri wese yakigira icye kuko ari igikorwa cy’umuco nyarwanda cyahozeho.

Usibye kuba uyu munsi wizihijwe no mu midugudu mu Rwanda, Ministre Mukeshimana asaba ko mu gihe kiri imbere iki gikorwa gikwiye kumanuka kikagera no mu miryango ku buryo bufatika. Ibi ngo bizagerwaho ari uko uyu muco utozwa abana ngo utazacika.

Umuganura nk’igikorwa cyo kwishimira ibyagezweho no gukundisha abanyarwanda umurimo, Kalisa Eduard Umunyamabanga uhoraho muri Minisiteri y’Umuco na Siporo yavuze ko uyu munsi ukwiye kuba inkingi yo kwigira nk’uko insanganyamatsiko y’uyu munsi wa none ibivuga.

Mu kwizihiza uyu munsi, Kalisa yasobanuye ko u Rwanda rwamuritse umusaruro mu nzego zose kuko umusaruro w’abanyarwanda ugaragara muri byinshi.

Mbere ya 1925 Umuganura wari umunsi ukomeye mu Rwanda wo kumurika no guha umugisha k’Umwami umusaruro w’ubuhinzi n’ubworozi, gusa guhera muri uriya mwaka abakoloni baciye uyu munsi, wongeye kugarurwa mu 2011 nko gusubiza agaciro umuco w’abanyarwanda.

Photos/E Birori/UM– USEKE.RW

BIRORI Eric
UM– USEKE.RW