Ministre w’Ububanyi n’amahanga wa Israel aragenzwa n’iki mu Rwanda?

Avigdor Liberman Ministre w’ububanyi n’amahanga wa Israel araba ari mu Rwanda guhera kuri uyu wa gatatu, ibiro bye byasohoye itangazo rivuga ko aje gutsura no gukomeza umubano Israel ifitanye na Africa, umubano ngo ugomba kurushaho gushingira ku bukungu, umutekano n’ubufatanye mu nzego zitandukanye.

Liberman si mu Rwanda aje gusa kuko mu rugendo rw’iminsi 10 ajemo muri Africa azasura Cote d’Ivoire, Ghana, Ethiopia na Kenya, azanye n’impuguke mu bintu bitandukanye ndetse n’abantu 50 bahagarariye kompanyi zikora ibintu bitandukanye muri Israel.

Mu Rwanda azahura na Perezida Kagame, anasinye amasezerano y’ubufatanye hagati y’ibihugu byombi we na Ministre w’ububanyi n’amahanga w’u Rwanda Louise Mushikiwabokuri uyu wa gatatu. Azahura kandi na Ministre w’Ubuhinzi n’ubworozi Dr Agnes Karibata mu gikorwa cyo gufungura centre y’amahugurwa ku buhinzi.

Israel ivuga ko ubufatanye n’umugabane wa Africa muri iki gihe ari ngombwa cyane mu by’umutekano, ubukungu na politiki.

Umwaka ushize Perezida wa USA n’ushinzwe ububanyi n’amahanga wa USA baje muri Africa, kimwe  na Perezida,  Ministre w’Intebe n’uwungirije ushinzwe ububanyi n’amahanga b’Ubushinwa nabo basuye ibihugu bimwe bya Africa.

Ibihugu by’ibihangange bivugwa ko ubu biri guhindura ijisho byarebaga Africa mu gihe gitambutse. Israel ivuga ko Africa ari ahantu h’ingirakamaro mu bufatanye mpuzamahanga.

Liberman avuga ko abona Africa nk’ahantu hakwiye ho gushora imari, ndetse hafite akamaro mu bukungu na politiki. Akemeza ko Israel yafasha henshi mu iterambere rya Africa nko mu Ubukungu, gufata neza amazi, ubuvuzi, kurwanya iterabwoba n’ibindi.

ububiko.umusekehost.com