Mike Buzangu wagiye gukina muri Algeria ageze kuki?

Umukinnyi w’umunyaCongo ariko wakiniye u Rwanda muri Basketball, Mike Buzangu, wakiniraga ikipe ya CSK Basketball Club kuva tariki 06 Gashyantare arakina muri Algeria. Uyu musore yabwiye Umuseke ko yagiye hariya agamije kuzamura urwego rwe rwa Basketball kandi abona bizashoboka.

Buzangu byanditse ko afite imyaka 28 yagiye gukina nk’uwabigize umwuga muri Club Sportif Constantine BBC. Aha bamuhaye amasezerano y’umwaka umwe.

Mike Buzangu aganira n’Umuseke yavuze ko yishimiye kuba yaragiye gukina nk’uwabigize umwuga, ko bizazamura urwego rwe mu mukino kandi ko bizanatuma anaha u Rwanda umusaruro mwiza cyane mu ikipe y’igihugu.

Buzangu yagize ati“Nari maze imyaka myinshi mu Rwanda. Ubu u Rwanda niho iwacu. Kuba ngiye gukina hanze y’u Rwanda ni byiza cyane kuri njye n’u Rwanda nk’igihugu. Ntuye mu Rwanda, amafaranga nzakorera, njye n’umuryango wanjye azatugirira akamaro, kandi abenshi mu banjye batuye mu Rwanda.”

Uyu musore wari umaze  imyaka ibiri mu  ikipe ya CSK, akaba  yarayifashije kurangiriza mu makipe ane ya mbere muri shampiyona ishize (amakipe akina “Playoffs”), ndetse banakina imikino y’Akarere ka gatanu 2015 yabereye mu Rwanda.

Buzangu wanakiniye ikipe ya APR BBC yabwiye Umuseke ko azakomeza kwitabira ubutumire bw’ikipe y’igihugu mu gihe abatoza bamuhamagara.

“Ikindi mutagomba kwirengagiza, ni uko Basketball yo mu bihugu by’abarabu iri ku rwego rwo hejuru. Ibi bizatuma nimpamagarwa mu ikipe y’iguhugu, ntanga umusaruro urenze uwo mu myaka ishize. Abatoza b’ikipe y’igihugu nibampamagara muzabona itandukaniro rya Buzangu muzi na Buzangu mushya.”- Mike Buzangu

Mike Buzangu yageze mu Rwanda mu 2007, aje mu ikipe ya APR BBC yakinnye ‘FIBA Africa Clubs Champions Cup’ ya 2008 yakiniye APR BBC, Kigali Basketball Club na CSK BBC.

Guhera 2008, Mike Buzangu yahise atangira gukinira ikipe y’igihugu Amavubi ya Basketball. Yari mu basore bakinnye AFRO Basketball yabereye muri Cote d’Ivoire muri 2013.

Roben NGABO
UM– USEKE.RW