Kirehe: Abatuye Rwanteru bakora 20Km kugira ngo bagere ku ivuriro

Abatuye mu kagali ka Rwanteru mu murenge wa Kigina Akarere ka Kirehe Iburasirazuba   baravuga ko bakora 20Km kugira ngo bagere ku ivuriro riri hafi kuko mu murenge wabo nta vuriro rihari. Barasaba Minisiteri y’ubuzima kugira icyo ibikoraho.

Aba baturage babwiye Umuseke ko kugira ngo bagere ku ivuriro bakoreshe amafaranga ibihumbi bibiri kugenda gusa, bagana ku ivuriro riri hafi.

Amavuriro abegereye ni ivuriro rya Rusumo riri mu kagali ka Nyamugali mu murenge wa Nyamugari ugana ku mupaka wa Rusumo cyangwa Ibitaro bya Kirehe biherereye mu murenge wa Kirehe ugaruka ugana i Kibungo. Aya mavuriro yombi iri hafi yabo riri muri 20Km.

Umwe mu baturage b’aha i Rwanteru waganiriye n’Umuseke ati “Biratugora cyane, hano ni mu cyaro guhagurutsa moto ngo ikugeze yo iguca ibihumbi bibiri kugenda gusa. Reba rero kujyana umurwayi n’amaguru, ajya kugerayo yazahaye.”

Kugera ku muganga ku babyeyi bari kunda no ku bantu barembye cyane muri aka gace birabagora cyane, bakaba bifuza ko Minisiteri y’ubuzima yabagoboka bakabona ivuriro hafi yabo.

Gerard Muzungu umuyobozi w’Akarere ka Kirehe yizeza abaturage b’aha Rwanteru ko bagiye kubakorera ubuvugizi bakabona ivuriro hafi. Abibutsa gutanga umusanzu w’ubwisungane mu kwivuza kugira ngo mu gihe bageze kwa muganga biborohere.

Uretse umurenge wa Kigina utarimo ivuriro na rimwe ikibazo nk’iki kiri no mu murenge wa Kigarama uhana imbibi na Kigina.

Elia BYUK– USENGE
UM– USEKE.RW