Kinshasa irifuza ko MONUSCO itangira kuva mu gihugu

Akanama k’umutekano k’Umuryango w’Abibumbye kateranye kuri uyu wa 19 Werurwe 2015 kiga uko ibintu bihagaze ubu muri Congo Kinshasa. Martin Kobler umuyobozi w’ingabo za UN ziri mu butumwa mu burasirazuba bwa Congo yavuze ko izi ngabo zikwiye kongererwa igihe muri iki gihugu kuko ngo hakiri akazi. Leta ya Kinshasa yo isanga igihe kigeze ngo izi ngabo zitangire gutaha buhoro buhoro. 

Kobler yavuze ko amahoro ataragaruka neza, gusa Minisitiri w’Ububanyi n’amahanga wa Congo Kinshasa Raymond Tshibanda we yavuze ko izi ngabo zikwiye gutangira gutaha buhoro buhoro.

Kobler yavuze ko hari intwambwe yatewe mu kugarura amahoro mu burasirazuba bwa Congo ariko hakiri byinshi byo gukora bityo ziriya ngabo zikwiye kongererwa igihe zifite hariya.

Ati “Ntabwo tuzatura muri Congo igihe cyose. Ariko kuhava bikwiye kuva ku musaruro twagezeho mu kugira ngo ibintu bimere neza.”

Raymond Tshibanda wari uuhagarariye Leta ya Kinshasa muri iyi nama yavuze ko koko hari intambwe yatewe mu kugira ngo habeho ‘stabilite’ muri Congo. Ariko izi ngabo zikwiye gutangira gutaha buhoro buhoro.

Ati “Uyu munsi haracyari ahantu hamwe na hamwe hari umutekano mucye muri Kivu ya ruguru na Kivu y’Epfo. Ahandi hose mu gihugu amahoro arahinda. Kandi birenzeho hari Leta ikora, inzego zemewe n’amategeko kandi zikomeye, igisirikare…. 

Republika iharanira Demokarasi ya Congo irashimira akazi kakozwe n’ingabo z’Umuryango w’Abibumbye. Ariko ibona (Republika) ko igihe kigeze ngo ifate inshingano yo kwirindira umutekano n’uw’abaturage bayo. Irasaba rero ko Inama y’umutekano ya Loni yumva ubwo busabe ikubaha ihame ry’ubusugire bwa buri gihugu.” 

Ingabo za MONUSCO zitangwaho akayabo karenga miliyari imwe n’igice y’amadorari y’Amerika buri mwaka nk’ingengo y’imari yo kubungabunga amahoro mu burasirazuba bwa Congo. Gusa muri aka gace ishinzwe haracyavugwa imitwe yitwaje intwaro ibangamiye abaturage ba Congo igera kuri 20 ndetse n’ibangamiye ibihugu bituranyi na Congo ya ADF-Nalu irwanya Uganda na FDLR irwanya Leta y’u Rwanda.

Umusaruro w’izi ngabo ukaba waragiye unengwa na benshi mu bayobozi b’ibihugu muri aka karere k’ibiyaga bigari. 

 UM– USEKE.RW