Igiciro cy’ibikomoka ku Petelori cyagabanyijweho 14Frw

Itangazo ryasohowe na Miniteri y’Ubucuruzi n’Inganda (MINICOM) ryashyizweho umukono na Minisitiri muri iyi minisiteri, Francois Kanimba rigaragaza ko igiciro cy’ibikomoka kuri Petelori cyagabanyijwe kiva ku mafaranga y’u Rwanda 888 gishyirwa kuri 874 kuri Litiro.

Iyi MINICOM ivuga ko iki cyemezo kizatangira kubahirizwa ku itariki ya 01 Ukuboza 2015 mu Mujyi wa Kigali gusa; iri tangaza rikavuga ko igiciro fatizo cya Lisansi kitagomba kurenza amafaranga y’u Rwanda 874.

Minisiteri y’Ubucuruzi n’inganda ivuga ko iri hinduka ry’ibiciro rishingiye ku imanuka ry’ibikomoka kuri Peteroli ryatangiye kugaragara mu kwezi kwa Kanama 2015.

Impinduka z’igiciro cy’ibikomoka kuri Petelori zaherukaga mu Ukwakira, aho na bwo cyari cyagabanyijwe kivuye ku mafaranga 920 gishyirwa kuri 920 kuri Litiro.

Nubwo benshi mu bakora ingendo bari bizeye ko iri gabanuka ry’ibikomoka kuri Petelori rizajyana n’igabanuka by’amafaranga y’ingendo, ariko si ko byaje kugenda kuko ahubwo mu mpera z’Ukwakira igiciro fatizo cy’ingendo cyazamuwe kikava ku mafaranga y’u Rwanda 18, kigashyirwa kuri 20 ku Kilometero mu Mujyi wa Kigali, naho igiciro cy’abajya mu Ntara kiva ku mafaranga 18 gishyirwa kuri 19.

Agaragaza impamvu y’izamuka ry’ibiciro by’ingendo, Maj. Patrick Nyirishema uyobora ikigo Ngenzuramikorere cy’imirimo imwe n’imwe ifitiye igihugu akamaro (RURA) yavuze ko igiciro cyari gisanzwe cyashyizweho muri 2012, bityo ko igihe cyo kubihindura cyari kigeze.

Maj. Patrick Nyirishema yavuze ko ibiciro by’ingendo byumvikana nk’ibikwiye kujyana n’iby’ibikomoka kuri Petelori bizongera kuvugururwa muri 2017.

Martin NIYONKURU
UM– USEKE.RW