Kanombe na Pierrot nabo bagiye kuva muri Rayon

Aphrodis Hategekimana uzwi cyane ku kazina ka Kanombe umukinnyi wo hagati wa Rayon Sports biteganyijwe ko kuri uyu wa mbere yerekeza muri Kenya kurangiza kumvikana n’ikipe ya Sofapaka.

Emmanuel Niyomusabye umuvugizi w’ikipe ya Rayon Sports yemereye Umuseke ko ikipe yiteguye kumuha urwandiko rumwemerera kugenda.

Naramuka agiye muri Sofapaka araba ajyanyeyo na Fuad Ndayisenga we wamaze kumvikana n’iyi kipe kuzayikinira umwaka utaha w’imikino.

Kanombe agomba kumvikana na Sofapaka mbere y’uko tariki 28 uku kwezi zigera kuko ariwo munsi wa nyuma wo kugura no kugurisha abakinnyi muri shampionat ya Kenya.

Pierrot ari kugura amasezerano ye ngo agende

Pierrot Kwizera rutahizamu w’umurundi Rayon Sports yaguze mu mezi atanu ashize ubu nawe ari gutanga amafaranga kuri iyi kipe y’i Nyanza kugira ngo agure amasezerano ye yari asigaye maze bamureke yigurishe yigendere.

Amakuru agera k’Umuseke aremeza ko Pierrot ari guha Rayon 2 000$ kugira ngo bamurekure agende.

Uyu musore yaguzwe 9 000$ na Rayon ariko ubwo yamusinyishaga imuha 4 000$ y’igice cya mbere ubu yari imusigayemo 5 000$.

Uyu mukinnyi umaze amezi atanu mu masezerano y’amezi 18 yari yasinye ari gutanga 2 000$ kugira ngo iyi kipe imureke agende kuko yari atararangiza amasezerano ye.

Amakuru agera k’Umuseke aremeza kandi ko bamwe mu bayobozi ba Rayon Sports babona icyifuzo cy’uyu rutahizamu, utaratanze umusaruro uhambaye yari ategerejweho, gifite ishingiro.

Jean Paul NKURUNZIZA
UM– USEKE.RW