Kamonyi: Umugabo yakubise inkoni umugore we aramwica

Mu kagali ka Nyarubuye Umurenge wa Rugalika mu karere ka Kamonyi ku mugoroba wo kuri iki cyumweru umugabo yakubise umugore we inkoni munsi y’ibere bimuviramo gupfa ako kanya. Ngo yamuzizaga ko yanze ko ajya kugurisha inkwi.

Uyu mugabo witwa Rusagara, Umuvugizi wa Police mu Ntara y’Amajyepfo yabwiye Umuseke ko hari amakuru ko asanzwe akunda gushyamirana n’umugore we kubera ubusinzi.

Ku mugoroba wo kuri iki cyumweru uyu mugabo ngo yaje mu rugo afata inkwi ashaka kujya kuzigurisha ngo ajye kunywa inzoga umugore aramubuza amubwira ko yareka zigakoreshwa mu rugo.

Uyu mugabo ngo yafashe inkoni atangira gukubita umugore we aza kuyimukubita munsi y’ibere abatabaye bumvise umugore atabaza basanga yashizemo umwuka.

Abaturanyi b’uyu muryango babwiye Umuseke ko umugore wishwe witwa Kankundiye Marcelline w’imyaka 40 umugabo we ko bakunze gushyamirana kubera ubusinzi bw’uyu mugabo.

Umwe mu baturanyi babo witwa Jean Baptiste Mihigo ati “Hari n’igihe twabakijije uyu mugabo nabwo rwose yenda kumuhitana kubera kumukubita cyane. Ibintu nk’ibi ni ibyo kwamagana cyane cyane ubusinzi nibwo bubitera.”

Police nayo ivuga ko atari ubwa mbere uyu mugabo yari ashyamiranye n’umugore we bapfa ko uyu mugabo ashaka kumarira imitungo y’urugo mu kabari.

Uyu mugabo Rusagara ubu afungiye kuri station ya Police ya Runda akurikiranyweho ubwicanyi.

Ihohoterwa rikorerwa mu ngo rikaba ritaracika, impamvu ziritera Police ivuga ko hafi buri gihe rikomoka ku gukoresha ibiyobyabwenge kuko ababikora benshi baba babinyoye.

Everyne Nadine Umubyeyi
UM– USEKE.RW