Iyo batabinsaba nari kwicara ngatanga umusanzu wo kubaka u Rwanda mu bundi buryo-Kagame

*Abanenga u Rwanda na bo banengwa ibyo bakora iwabo, baravuga ubusa,
*Nyaruguru yagira ikiyivamo kuko ifite abantu

Ku isaha ya saa 12h 15 Perezida Kagame Paul, Umukandida wa RPF-Inkotanyi yari ageze kuri site iri ahazwi cyane nka Ryabidandi, mu murenge wa Nyagisozi, mu karere ka Nyaruguru, yabwiye abaturage ko ibyo RPF yakoze bitakorwa na buri wese, ndetse ngo usubije amaso inyuma mu myaka 23 nta wahombye buri wese yarungutse.

Kagame Paul akigera kuri site ya Nyagisozi yakiriwe n’ibyishimo byinshi by’abanyamuryango ba RPF-Inkotanyi, barararirimba indirimbo zisingiza ibikorwa by’ubutwari bye.

Alphonse Munyantwali wayoboye Intara y’Amajyepfo, akaba kuri uyu wa gatandatu yatangajwe nk’ukuriye ibikorwa byo kwamamaza Chairman wa RPF-Inkotanyi nubwo ubwo kwamamaza byatangiraga ari Minisitiri Uwacu Julienne wari watangajwe kuri uyu mwanya, yavuze ko Perezida Kagame yafashije Nyaruguru kubona ishwagara bagahinga bakeza, ngo ibikorwa remezo byari 0,8% mu myaka irindwi ishize, bigeze kuri 22%, amashanyarazi ari mu mirenge yose ngo bizoroha kuyageza aho atari naho amazi meza byari kuri 50% ubu bageze kuri 89%.

Perezida Kagame Paul, Umukandida wa RPF-Inkotanyi, yabwiye abaturage ba nyaruguru ko bigaragara uko bakeye n’uko babukereye bivuze aho igihugu kigeze.

Ati “Bivuze u Rwanda rwongeye kuba igihugu cya ba nyiracyo nta n’umwe usigaye inyuma. Kongera gushyira Abanyarwanda hamwe batojwe mu gihe cy’ubukoloni ko umuntu atandukanye n’undi, kubona ko uko abantu batandukanye batabikuramo icyiza ahubwo bagakuramo urwangano, Abanyarwanda bagenda bigishwa kwangana, kwicana, aho tugeze ibyo kwangana no kwicana ntaho bifite byamenera.”

Yavuze ko abibwira ko aho igihugu kivuye n’aho kigeze ari akazi koroshye ka korwa n’umuntu wese uvuye ikantarange wicara i Burayi akandika akanenga, abo ngo si “abo muri iyi si tubamo”.

Ati “Abanyarwanda biyunze, bicara bakabana, bakumva ko bakora bagatera imbere si ibintu wumva ko wicara bugacya bikakwizanira, si ibintu bibonekerwa nk’uko mubonekerwa i Kibeho, ni ibintu bisaba kwicara mugakora mugatekereza, si ibintu byizana.”

Yavuze ko iryo somo Abanyarwanda baryize mu bintu byabahungabanyije, “byatwishe, ni ibintu biruhije kugira ngo abo bantu bicare bavuge ntabwo ari byo.”

Ati “Ntituzabuza abashinyaguzi kudushinyagurira, ntituzabuza abavuga ubusa kuvuga ubusa, twebwe ibyo tuvanamo ni imbaraga zituma tugera kuri byinshi twifuza. Ibyo RPF yakoze si ibintu byari bukorwe na buri wese, byari bishingiye ku bushake no ku bikorwa.”

Kagame yavuze ko mu myaka yashize, nko mu 1996-97 ngo “ntawaduhaye amahirwe, bari bazi ko iki gihugu kitazavayo, cyangwa bari bazi ko kizavanwayo n’abandi batari Abayarwanda ariko Abanyarwanda ni bo bivanyeyo.”

Ati “Uyu munsi turi mu gikorwa cyo gusubira mu nzira yatuvanye ahabi, no guhitamo abayobozi bahatugeza. Mwarabanje murabisaba, iyo mutabisaba nari niteguye kubana namwe mu buryo busanzwe, nanjye nkagira umusanzu ntanga nk’abandi Banyarwanda bose, ntacyo byari bintwaye, n’ubu ntacyo bintwaye. Mwabisabye muri Referendum, nanjye ntahandi nari gushingira hatari ukubahiriza icyifuzo cyanyu.”

Kagame yavuze ko yabyemeye ngo igihugu kigere kuri byinshi kugira ngo icyifuzo n’ikiba ikindi, ikindi gihe ibyo “twagezeho bitazagira ubihungabanya.”

Ati “Mu nshingano dufite harimo n’iyo yo gukomeza umusingi, kubakira ku musingi, ibikomeye bikaramba bityo tugakomeza tujya imbere. Gukorera hamwe ibyiza mu myaka iri imbere ibyo tumaze gukora byatubereye urugero rw’ibishoboka.”

Agendeye kubyavuzwe na Asteriya ku iterambere yagezeho nk’umugore utarakarabaga, ubu ukeye wateye imbere Kagame yavuze ko mu myaka ishize 23 ntawahombye abantu bateye imbere.

Ati “Aravuga ibyabaye, bitabaye ahandi na we yagizemo uruhare, kandi yavugiraga n’abandi Banyarwanda benshi, nabivuga ntagushidikanya ko uko muri hano mwese n’aba bana, nta muntu n’umwe ushobora kuvuga ko uko umwaka washiraga ushyira undi, ko hari uwarushijeho gutakaza kuruta kunguka.

Buri wese uri aha yavuga aho yavuye habi n’aho yageze hashimishije. Bamwe bashobora kuvuga ko bageze aheza hashimishije kurusha abandi ariko buri wese afite aho yageze.”

Kagame yavuze ko Nyaruguru yari yaratawe, abantu bumva nta kintu cyava Nyaruguru, ati “Nyaruguru yabura gute kugira ikiyivamo kandi hari abantu, abantu nibwo bukungu bwacu bwa mbere niyo mpamvu abana tubifuriza amashuri, tubifuriza ubuzima bwiza, tubifuriza kumenya gukora kugira ngo bitunge banatunge igihugu cyabo.”

Iyo ngo ni intego yo mu myaka irindwi ati “Iyi myaka irindwi ndabivuga ntashidikanya, ni RPF-Inkotanyi, ni umukandida wayo ni abayishyigikiye, none se njyaho mbeshye. Nimwe mwabihisemo. Kuza hano ni ugushima icyizere mwagize kuva rugikubita kugera n’ubu ngubu. Mutugirire icyizere tuzagera kuri byinshi, nk’uko bavuga ibyiza biri imbere mukore, imbere niho hari byinshi.

Naje kubashimira, naje kwifatanya namwe muri iki gikorwa cy’amatora mwanshyize imbere, igihe bikindeba ntabwo nzabatenguha na rimwe. Ibyo ndabyizeye.”

Kandida Perezida Paul Kagame watangiriye ibikorwa byo kwiyamamaza no kwamamazwa mu ntara y’Anajyepfo uyu munsi akaba avuye Nyaruguru, yahise akomereza mu karere ka Gisagara.

AMAFOTO@MUGUNGA Evode/UM– USEKE

Ange Eric HATANGIMANA
UM– USEKE.RW