Interview asohoka muri Office: Obama ati “Iyo niyamamaza nari gutsinda”

Harabura igihe gito Perezida Obama agasohoka muri White House agahigamira Donald Trump uherutse gutsinda mu buryo butunguranye. Mu kiganiro kiri mu byanyuma yatanze akiri kuri uyu murimo Perezida Obama yavuze ko yashoboraga gutsinda iyo aza kuba yemerewe kwiyamamaza.

Ati “Ndabyizeye neza ko iyo nza kwiyamamaza nanone nari kubasha kuzana abantu benshi inyuma yanjye.”

Ni ibyo yatangagrizaga “The Axe Files” ikiganiro yakoze kuri uyu wa mbere gikorwa na Kaminuza y’ibya Politiki ya Chicago na CNN.

Ati “Ibyo ndabuzi nkurikije ibiganiro nagiranye n’abaturage hirya no hino mu gihugu, yewe n’abo tutabonaga ibintu kimwe bavugaga ko icyerekezo nganamo ari cyo.  

Mbere gato y’amatora n’intsinzi ya Trump, abantu benshi bavugaga ko babona hari ukuntu bidakwiye.”

Mu matora hagati ya Trump na Hillary Clinton nta n’umwe muri bo watsinze ku bwiganze busesuye. Gusa Clinton yarushije Trump amajwi y’abaturage agera kuri miliyoni 2,9 nubwo Trump yatsinze mu nteko y’abatora bagera kuri 565.

Mu kiganiro cy’iminota 50, Obama yavuze ko Abademocrates na Clinton mu kwiyamamaza ingingo zabo zitanyuze cyane abanyamerika benshi cyane cyane ku kuzahura ubukungu, bityo bituma Clinton atabasha gutsinda ku bwiganze bw’amajwi ya rubanda.

Trump amaze kumva ibyavuzwe na Obama ko iyo yiyamamaza yari gutsinda yahise ajya kuri Twitter ararikocora.

Ati “Perezida Obama yavuze ko atekereza ko iyo yiyamamaza yari kuntsinda. Nta kindi yari kuvuga, ariko NDAMUHAKANIYE!- Nta mirimo, ISIS, ObamaCare, etc…”

Obama na Trump bakomeje kutumvikana no kunengana kuva ibihe by’amatora biheruka.

Iminsi ibiri nyuma y’amatora bahuriye muri White House, kubonana kwabo kwarimo umususu mwinshi, ariko kuva icyo gihe aba bagabo ngo bakunda kuganira kenshi kuri telephone.

UM– USEKE.RW