Imibonano mpuzabitsina igihe umugore atwite

Abantu benshi bakunda kwibaza niba gukora imibonano mpuzabitsina igihe umugore atwite nta ngaruka byagira ku mwana atwite cyangwa se no kuri nyina ubwe. Aha tugiye gusubiza bimwe mu bibazo abantu bashobora kwibaza ku gutera akabariro nyamara umugore utwite.

1.Ese imibonano mpuzabitsina iremewe ku mugore utwite ? Yego.

Imibonano mpuzabitsina iremewe mu gihe cyose umugore atwite iyo nta bibazo bidasanzwe afite kuri iyo nda cyangwa se yigeze agira ku nda zabanje.

Ariko kuba imibonano mpuzabitsina yemewe ntibivuze ko abagore bagomba cyangwa baba bashaka kuyikora kuko impinduka ziba ku mugore utwite zitera bamwe guhurwa icyo gikorwa. Kitanakorwa uko wiboneye mu gihe umugore atwite.

Bivuze ngo kuganira birambuye hagati y’umugore n’umugabo ni byo byafasha ku rwanya amakimbirane aturutse ku bwumvikane bucye ku byerekeye imibonano mpuzabitsina mu gihe umugore atwite.

 2.Ni ryari imibonano mpuzabitsina itemewe ku mugore utwite ?

Muganga ashobora kugira inama umugore utwite kutabonana n’umugabo bitewe na zimwe muri izi mpamvu :

• Ntibyemewe ku mugore utwite kubonana n’umugabo utazi ubuzima bwe bw’imyororokere (nib anta ndwara afite) uretse ko no ku bandi bitemewe

• Kuba uheruka gukuramo inda

• Kuba uheruka kubyara umwana udashyitse

• Kuba uva amraso mu gitsina

• Kuba watangiye kubona amazi mu gitsina cyawe(isuha yamenetse)

• Kuba umura wawe udafunze neza (incompetent cervix)

• Utwite abana barenze umwe n’izindi mpamvu zatuma muganga akugira iyo nama

3.Ese imibonano ntacyo yatwara umwana wanjye ?

Oya,umwana uri munda aba arinze bihagije kuburyo igitsina cy’umugabo ntaho gihurira nawe mu gihe cy’imibonano.

4.Ese imibonano mpuzabitsina no kurangiza(orgasm) ntibyatuma inda ivamo cyangwa bigatera ibise ?

Ku nda zidafite ibibazo (low risk) igisubizo ni HOYA. Ariko ugomba kwegera abaganga ukamenya koko ko inda yawe nta kibazo ifite. Cyakora abaganga bamwe bagira inama abagore guhagarika imibonano mpuzabitsina mu byumweru bya nyuma kuko amasohoro ashobora gutuma ibise bitangira.

5.Ese birasanzwe kuba umugore utwite ubushake bwo gukora imibonano bwakwiyongera cyangwa bwagabanuka ?

Byose ni ibisanzwe bitewe n’imihindukire y’umubiri wa buri muntu. Abagore bamwe bagira umunaniro, iseseme, kubabara amabere n’ibindi bituma bumva ubushake bwo gukora imibonano bwagiye,  cyane cyane mu mezi yambere. Hari n’abandi rero barushaho gushaka gukora imibonano igihe batwite. Biterwa n’umubiri wa buri umwe.

6.Ni ryari umuntu yakwisunga muganga ?

Umugore utwite agomba kwisuzumisha igihe atwite ari nabwo muganga azemeza koko ko inda ye nta kibazo ifite. Ikindi igihe ubonye ibinyetso bidasanzwe nko kuva amaraso mu gitsina n’ibindi nyuma y’imibonano ugomba kwihutira kwegera muganga. Tuzakomeza n’ibyerekeye imibonano mpuzabitsina nyuma yo kubyara.

Corneille K.Ntihabose
UM– USELE.COM