Ibihembo bihabwa iyatwaye icy’amahoro biraciriritse- Min Amb Nduhungirehe

Umunyamabanga wa Leta muri Minisiteri y’ububanyi n’amahanga Olivier Nduhungireh ubwo yari yaje kureba umukino wa nyuma w’igikombe cy’amahoro wari wahuje AS Kigali na Kiyovu FC yabwiye Umuseke urebye igisobanuro cy’igikombe cy’amahoro ukareba n’ibihembo bigitangwaho usanga biciriritse.

Uyu munyacyubahiro usanzwe ufana Mukura VS avuga ko n’ubwo nta kipe yafanaga mu zakinnye kuri uyu wa Kane ariko asanga ikipe itwaye kiriya gikombe iba igomba guhembwa byisumbuyeho.

Ati: “ Mu bindi bihugu igikombe cy’igihugu kiba ari’ikintu kingenzi cyane, ibihembo by’amakipe yabaye aya mbere bikaba nabyo biremereye kurushaho. Ibihembo bitangwa usangwa muri iki gikombe usanga biciriritse.”

Asaba kandi ko imikino ya nyuma (final) yazajya ikinywa hari abayobozi bakuru b’igihugu benshi kigatangwa bahari.

Amb Nduhungirehe ashima uko amakipe yo mu Rwanda ari kuzamuka mu mikinire ariko agasaba ko yakomereza aho akazagera no mu gikombe cy’Isi.

Uyu mukino w’ejo hagati ya AS Kigali na Kiyovu wari witabiriwe n’abanyacyubahiro batandukanye barimo Perezida wa Sena Bernard Makuza,  Minisitiri w’umuco na sports Nyirasafari Esperance, Umunyamabanga wa Leta muri Minisiteri y’uburezi Dr Isaac Munyakazi n’umunyamabanga wa Leta muri Minisiteri y’ibikorwa remezo Uwihanganye Jean de Dieu.

Ikipe itwaye igikombe cy’Amahoro ihembwa miliyoni Frw 10.

Jean Paul NKUNDINEZA

UMUSEKE.RW