Ibihe by’ingenzi byaranze “Collective Rw fashion week 2017”
Muri iyi week end abahanga imideri 10 bamuritse imwe mu myambaro bahimbye mu gitaramo cyiswe ” Collective Rw fashion week 2017″ cyabaga ku nshuro ya kabiri
Ni igitaramo cyitabiriwe n’abamurikamideri baturuka mu bihugu by’u Rwanda, Uganda , Burundi n’ahandi.
Bose bazengurutse ku rutambukiro mu myambaro itandukanye yahimbwe na Cedric Mizero, Mathiew Rugamba, Izu y’imideli ya Haute Baso, Teta Isibo ufite inzu y’imideli ‘Inzuki’, Sonia Mugabo, inzu y’imideli ” Uzi collection”, inzu y’imideli ” Moshions”, inzu y’imideli “Ikwize”, Afriek aba bose bakorera mu Rwanda hamwe n’inzu y’imideli “Maxhosa by Laduma” yo muri Afurika y’Epfo.
Ibi birori by’imbonekarimwe byayobowe n’abashyushyabirori Regis Isheja na Kemiyondo Coutinho waturutse muri Uganda
Ibi birori byatangiye ahagana Saa mbili zijoro kuwa gatandatu, byari bigabanyijwemo ibyiciro bibiri, mu kiciro cya mbere habanje kumurikwa imyenda y’abahanga imideli batanu, hakurikiraho akaruhuko k’iminota 30 maze ikiciro cya kabiri ari n’acyo cyanyuma gikurikiraho, abahanga imideli batanu bari basigaye nabo berekana imyenda bahimbye.
Imyenda yamuritswe muri iki gitaramo yari yiganjemo ikinyafurika cyane , imwe muri iyo myenda yari igizwe n’ibitenge indi nayo yahanzwe mu bitambaro bitandukanye.
Ku ikubitiro Cedric Mizero niwe wabanje ku rutambukiro yerekana imyenda yahanze iri mu ishusho ry’urubura , ni imyambaro yishimiwe n’abantu benshi kuko yari ikoranywe ubuhanga.
Ku nshuro ya kabiri hakurikiyeho imyenda yahimbwe na Ikwize , imyinshi muri yo yari ikozwe mu bitenge.
Inzu y’imideli ya Uzi Collections nayo yahise ikurikiraho ku mwanya wa gatatu. nyuma y’aba hamuritswe imyenda yahanzwe na Moshions.
Ikiciro cya mbere cyashojwe n’imideli yahimbwe na Afriek.
Nyuma yo kuva mu karuhuko Teta Isibo yahise amurika imideli ye, yakurikiwe na Haute Baso nabo bamuritse imyenda yabo.
Mathiew Rugamba nawe yahise amurika imyenda y’abagabo yahimbye , nyuma ye haje gukurikiraho Sonia Mugabo nawe wamuritse imideli yahimbye.
Iki Gitaramo cyasojwe hamurikwa imideli yahimbwe n’umunya Afurika y’Epfo Laduma Ngxokolo ufite inzu y’imideli ya “Maxhosa by Laduma”.
Photos © R.Kayihura/Umuseke
Robert KAYIHURA
UM– USEKE.RW