Goodluck ashobora kurega abamushyize ku rutonde rw’abayobozi 9 b’abaherwe

Perezida Goodluck Jonathan wa Nigeria yavuze ko ashobora gukurikirana urubuga rwa Internet rwamushyize ku rutonde rw’abayobozi icyenda b’ibihugu bya Africa bakize cyane kurusha abandi.

Urubuga rwa richestlifestyle.com rwatangaje ko Goodluck Jonathan ari uwa gatandatu kuri uru rutonde n’umutungo ubarirwa muri miliyoni 100 z’amadolari y’America nk’uko bitangazwa na BBC.

Ibiro by’umukuru w’igihugu muri Nigeria byatangaje ko ibyavuzwe nta bimenyetso bifatika bifite.

Perezida wa Nigeria ariko akaba ngo n’ubundi umutungo we utazwi muri rusange.

Mu 2012  muri Nigeria urwego wagereranya n’urw’Umuvunyi mu Rwanda rwitwa Code of Conduct Bureau, ikinyamakuru Vanguard cyo muri Nigeria cyavuze ko rwatangaje ko Perezida Jonathan yatangarije umutungo we uru rwego ariko nta tegeko rimuhatira kuwutangariza rubanda rwose.

Ibiro bya Perezida Jonathan byasohoye muri ririya tangazo ko hari itandukaniro rinini cyane na miliyoni 100$ zivugwa na richestlifestyle.com ko ariwo mutungo wa Perezida Jonathan.

Iri tangazo rivuga ko Perezida atangariza umutungo we urwego rubishinzwe uko bigenwa n’itegeko kuva mu 1999 ubwo yajyaga ku butegetsi.

Iri tangazo rikavuga ko Perezida nta wundi mutungo yigeze abona uvuye mu bindi bitari imishahara ye nka Visi Guverineri, Guverineri, Visi Perezida na Perezida.

Urubuga rwatangaje urwo rutonde ngo rushobora gukurikiranwa mu nkiko niba rutavanyeho iyo nyandiko rukanasaba imbabazi nk’uko byanditse muri iryo tangazo.

Kuva iri tangazo ryasohoka icyo uru rubuga rwakoze ni ukuvanaho umutungo mu madorari wa Perezida Jonathan ariko rumugimisha ku mwanya wa gatandatu.

Kuri uru rutonde

8) Robert Mugabe – $10 Million

7) Idriss Deby –$50 Million

=6) Goodluck Jonathan & King Mswati III –  $100 Million

5) Paul Biya –   $200 Million

4) Uhuru Kenyatta – Net Worth: $500 Million

3) Teodoro Obiang Nguema Mbasogo – $600 Million

2) Mohammed VI of Morocco –   $2.5 Billion

1) Jose Eduardo dos Santos –   $20 Billion

UM– USEKE.RW