Gisagara barifuza iki kuri Perezida uzatorwa?

Bishimira ko ubu nta kibazo cy’imihanda mibi bafite kuko myinshi muri aka karere yakozwe neza, amashanyarazi yariyongereye bigaragara, uburezi bw’ibanze bw’imyaka 12 abana batiga ni bacye cyane, gahunda zo kubavana mu bukene nka “Gira Inka”,VUP n’izindi bishimira… Ariko hari n’ibyo bagikeneye bifuza kuri Perezida uzatorerwa manda itaha.

UBUZIMA

Umuseke wasanze ab’i Gushubi bavuga ko bagikora urugendo rurerure cyane bajya i Mamba ku bitaro bya Gakoma ari byo bikuru bibari hafi. Ntabwo ari kure cyane ahubwo ni uko ubu bibasaba kuzenguraka bagaca i Musha bakazamuka i Gakoma aho batanga kuri moto ibihumbi 10 yose. Nyamara ngo umuhanda wambuka igishanga cy’Akanyaru bemerewe ubaye wuzuye byakoroha kuko i Gakoma atari kure cyane uvuye i Gishubi nko mu kagari ka Nyabitare cyangwa Nyakibungo.

Habinshuti Innocent utuye mu kagari ka Nyakabungo yabwiye Umuseke ko abaturage ba hano bafite ikibazo gikomeye cy’amakosa ari mu byiciro by’Ubudehe kandi atarakosorwa bibaka bifite ingaruka zikomeye kuri benshi mu baturage. Hari benshi bashyizwe mu byiciro bitajyanye n’ubushobozi bwabo.

UBUREZI

Urubyiruko rwo muri aka karere rwabwiye Umuseke ko bafite ikibazo cy’amashuri yigisha ubumenyingiro macye cyane. Nk’ibyo kwiga amategeko y’umuhanda byo bisaba kujya mu karere ka Huye. Mu mirenge ya Mugombwa, Mukindo, Muganza, Mamba na Gishubi amashuri y’imyuga arakenewe cyane.

UBUKUNGU

Bafite ibishanga byagenewe guhingwamo umuceri bitaratunganywa, abaturage barifuza ko bitunganywa vuba kuko ubukungu bwabo bushingiye ku buhinzi.

Igishanga cya Mirayi n’igishanga cya Nkunamo gihuza Gishubi na Mamba ntibigitanga umusaruro kuko byakamye cyane, basaba ko byubakwaho ingomero zigezweho zigafasha kubyuhira bigahingwa bigatanga umusaruro kuko byari bitunze benshi.

IBINDI…

Muganza na Gishubi hari henshi batarabona amashanyarazi, mu kagari ka Saga mu murenge wa Muganza bo nta mashanyarazi bazi habe n’ibiti (poteaux) byayo byahashinzwe nyamara ibigo by’amashuri bihari babihaye za mudasobwa…

Aka gace kandi hari abaturage bakivoma ibishanga, barifuza ko Perezida uzatorwa azabitaho bakagerwaho n’amazi meza.

Aha mu kagari ka Saga bakora urugendwo rw’amasaha atatu n’amaguru bajya ku kigo nderabuzima cya Mugombwa ari nacyo kiri hafi yabo. Barifuza nibura Poste de sante.

Umumotari witwa Emmanuel Habiyambere we ati “Natwe ariko dukeneye umuhanda muzima nk’abandi bose. Iyi mnda Perezida uzajyaho ahubwo azahere kuri iki kifuzo cyacu.”

Christine NDACYAYISENGA
UM– USEKE.RW/GISAGARA