Gisagara: Abarokotse batishoboye bahawe insina ngo biteza imbere

Mu gihe u Rwanda rukiri mu minsi 100 yo kwibuka ku nshuro ya 23 Jenoside yakorewe abatutsi, ikigo gishinzwe gutubura imbuto zizwi nka Haut Culture  zirimo insina, inanasi n’izindi baremeye abarokotse Jenoside yakorewe abatutsi 300 bo mu murenge wa Nyanza mu karere ka Gisagara aho bahawe insina  ibihumbi 2 000.

Abahawe iyi nkugna ngo bayishimye kuko igiye kubafasha kurushaho kwiteza imbere kuko bari basanzwe bakora ubuhinzi bw’insina ariko butabahaga umusaruro uretse igitoki cyo kurya gusa.

Mukagakire Bertilde wahawe insina 100 avuga ko ubu mu mwaka umwe azaba yatangiye gusarura ibitoki ndetse agasagurira n’isoko mu gihe ubuhinzi yakoraga bwamuhaga igitoki cyo kurya gusa.

Rangira Aimable nawe wahawe insina 100 we ngo yari afite ubutaka ariko adafite ubushobozi bwo kwigurira insina nk’izi ahawe, kuba azibonye ngo biramufashe gutera intambwe.

Patrick Rukundo umukozi mu kigo cya Faim Africa Ltd ikigo gitubura imbuto avuga ko impamvu bahisemo guha insina aba batishoboye ari uko basanze muri iyi minsi igitoki gifite agaciro gakomeye kandi bakumva ko arizo zabafasha kwiteza imbere vuba.

Ati “Twakabaye tubaha inka cyangwa ikindi cyose ariko twahisemo kubaha insina kuko muri iyi minsi igitoki gifite agaciro gakomeye bityo tukumva ko arizo zizabaha amafaranga ahoraho kandi bakanakirya.”

Insina zatanzwe zifite agaciro ka miliyoni imwe n’ibihumbi maganinani (1,800,000Frw) insina imwe ifite agaciro k’amafaranga 800 y’u Rwanda.

Faim Africa ifite gahunda yo gutanga insina ku batishoboye  igihumbi (1000) bo mu karere ka Gisagara ngo bibafashe kwihuta mu iterambere.

Christine NDACYAYISENGA
UM– USEKE.RW/Gisagara