Fuad Ndayisenga yafashije Rayon gusezerera Etincelles muri 1/4
Ba myugariro ba Etincelles bihagaze cyane mu gice cya mbere ku gitutu cya ba rutahizamu Peter Otema (imbere y’utera) na Fuad Ndayisenga (inyuma ye)
Kapiteni wa Rayon Sports Fuad Ndayisenga uri gukina imikino ye ya nyuma muri Rayon Sports uyu mwaka w’imikino mbere y’uko ajya muri Sofapaka muri Kenya, niwe watsinze ibitego bibiri Rayon Sports yatsinze Etincelles FC mu mukino wa 1/4 cy’igikombe cy’amahoro kuri iki cyumweru kuri stade yo ku Kicukiro.
Ibitego bibiri ku busa bwa Etincelles byombi byatsinzwe na Fuad Ndayisenge mu gice cya kabiri nyuma y’uko Etincelles nayo yari yihagazeho cyane mu gice cya mbere cyarangiye ari ubusa ku busa.
Igitego cya kabiri cya Rayon Sports Ndayisenga yagitsinze kuri Penaliti itavuzweho rumwe kuko umuzamu yafashe umupira ntawukomeze ukidunda hafi y’umurongo maze abasifuzi bakemeza ko umupira widunze mu gice cy’inyuma y’umurongo ko bityo ari igitego.
Rayon Sports muri uyu mukino niyo yabonye uburyo bwinshi bwo gutsina kurusha Etincelles y’i Rubavu, gusa uburyo bwose yabonye ntabwo ari ko yabubyaje umusaruro.
Rayon Sports izahura na Isonga FC yo yabashije gusezerera ikipe ya Espoir FC y’i Rusizi kuri za Penaliti.
Mu yindi mikino ya kimwe cya kane yabaye, amakipe yose yanganyije igitego kimwe kuri kimwe maze izakomeje zikomeza hitabajwe za Penaliti.
Indi mikinoya 1/4 yabaye:
Police 1 – 1 Kiyovu (Police yakomeje kuri penaliti 7-6)
Isonga 1 – 1 Espoir (Isonga yakomeje kuri Penaliti 5-4)
APR FC1 – 1 Gicumbi (APR yakomeje nayo kuri Penaliti 5-4)
Muri ½ talikiya 27/06/2015
Rayon Sports vsIsonga
APR FC vs Police FC
Jean Paul NKURUNZIZA
UM– USEKE.RW
English