Bwa mbere hagiye kuba CECAFA y’abagore n’abato

Inama yabaye tariki 4 Mutarama 2016, muri Sudani yahuje abayobozi ba CECAFA yemeje ibihugu bizakira imikino ya CECAFA y’amakipe y’ibihugu “Senior Challenge Cup 2016”, “CECAFA Kagame Cup”, ndetse bwa mbere mu mateka ya CECAFA hanashyirwaho imikino izahuza amakipe y’ibihuhu y’abagore, n’ay’abakiri bato.

Inama y’inteko rusange y’impuzamashyirahamwe y’umupira w’amaguru mu karere ka Afurika yo hagati n’iy’Iburasirazuba ‘CECAFA’ yateraniye mu Mujyi wa Khartoum ho muri Sudani yemeje ko CECAFA ihuza amakipe y’ibihugu izaba mukwezi kw’Ukuboza 2016, ikabera muri Sudani; Mu gihe CECAFA Kagame Cup (ari naryo ryonyine rihuza amakipe atari ay’ibihugu/club) yo izaba muri Nyakanga 2016, ikabera mu kirwa cya Zanzibar.

Uyu mwaka ni wo ugiye kubamo amarushanwa menshi ategurwa na CECAFA, dore ko ubuyobozi bwa CECAFA bwemeje ko hazaba CECAFA y’abatarengeje imyaka 17, ndetse na CECAFA mu rwego rw’abagore yose ikazabera muri Uganda. Igihugu cy’u Burundi kiri mu bibazo bya Politike muri iki gihe cyo kizakira imikino ya CECAFA y’abatarengeje imyaka 20.

Nkuko byatangajwe n’umuyobozi wa CECAFA Dr Mutasim Gafar ukomoka muri Sudani, aya marushanwa yose azaba aterwa inkunga n’ishyirahamwe ry’umupira w’amaguru ryo muri Saudi Arabia, kuko bafitanye amasezerano y’ubufatanye.

Umunyamabanga Mukuru wa CECAFA, Nicholas Musonye yatangaje ko uyu mwaka bagiye gushyira ingufu mu kuzamura umupira w’amaguru mu bakiri bato, ndetse no mu bagore, ari nayo mpamvu ngo bashyizeho amarushanwa y’amakipe y’ibihugu muri ibyo byiciro.

Musonye yavuze ko kandi bihaye ingamba ko mu myaka 5 iri imbere hari ikizaba kimaze gukorwa mu guteza imbere imikino mu bana, n’abagore, ndetse n’iterambere mu bya Tekinike.

CECAFA Kagame Cup iheruka yabereye muri Tanzania, itwarwa na AZAM FC itsinze Gor Mahia FC yo muri Kenya. Mu gihe CECAFA y’ibihugu yo yabereye muri Ethiopia, ikegukanwa na Uganda itsinze u Rwanda ku mukino wa nyuma.

Ngabo Roben
UM– USEKE.RW