AS Kigali yatsinze 1-0 Al Ahly Shandi ya Sudan

Mu mukino w’amayeri menshi, kuri uyu wa 1 Werurwe i Nyamirambo warangiye ikipe ya AS Kigali ibonye igitego kimwe ku busa bwa AS Ahly Shandi yo muri Sudani. Ni umukino ubanza wa 1/16 mu mikino y’amakipe yabaye aya mbere iwayo ya CAF Confederation Cup.

Umukino wari urimo kwigana cyane, igice cya mbere cyarangiye amakipe yombi akiniye cyane hagati gusa, nta buryo bufatika bwagaragaye ndetse nta kazi gakomeye abazamu bombi babonye.

Mu gice cya kabiri, AS Kigali yari iri mu rugo yagaragaje ubushake bwo gusatira, ikipe ya Al Ahly Shandi nayo yerekanye ko ari ikipe imenyeranye cyane ndetse izi guhanahana neza.

Uburyo bwabonetse bwo gutsinda ni ubwabonywe na Ndikumana Bodo wa AS Kigali ariko ntabashe gutera mu izamu ku nshuro zigera kuri ebyiri yabonye uburyo bwiza mu gice cya kabiri.

Captain w’ikipe ya AS Kigali yigaragaje cyane ku mukino wa none, yahaye imipira myiza yavamo ibitego Ndikumana Bodo ariko uyu agomba kuba uyu munsi utari uwe kuko yahushije inshuro ebyiri zabazwe.

Ku mupira waturutse kuri ‘corner’ ya AS Kigali, habayeho kugundagurana gato maze Murengezi Rodriguez arekura ishoti ahagaze nk’aho baterera Penaliti maze umuzamu ntiyabasha kuwugarura kuko wari mu iguni ry’izamu cyane, kiba kiranyoye. Hari ku munota wa 76 w’umukino.

Nyuma y’umukino Casambungo André utoza AS Kigali yavuze ko ntako abasore be batagize muri Sudan bazagerageza guhagarara ku gitego kimwe batsinze bakaba bashaka n’ibindi. Yemeza ko bakinnye neza n’ubwo kandi bahushije uburyo bwinshi bwo gutsinda.

Fath Nagar utoza Al Ahly Shandi yavuze ko yabonye AS Kigali ari ikipe nziza, ko agiye kuyitegura iwabo kandi yizeye neza ko igitego kimwe batsinzwe azakishyura kandi akarenzaho akayisezerera kuko ngo biteguye bihagije kugera kuri muri iri rushanwa.

AS Kigali yakomeje gushaka ikindi gutego ariko biranga umukino urangira babonye impamba y’igitego kimwe bazajyana i Shandi mu majyaruguru ya Sudani mu cyumweru gitaha mu mukino wo kwishyura.

Muri 1/32 ikipe ya AS Kigali yari yabashije gusezerera ikipe ya Academie Tchité y’i Burundi.

Mu mukino y’amakipe yabaye aya mbere iwayo, Rayon Sports yo yasezerewe na AC Leopards yo muri Congo Brazzaville.

ububiko.umusekehost.com