As Kigali 4 -1 Kiyovu, APR FC itsinda Sunrise bigoye

CHIEF EDITOR
01/10/2015

I Nyamirambo ikipe ya As Kigali yatsinze Kiyovu Sports ibitego 4-1 naho kuri stade Amahoro i Remera APR FC yari yabanjwe igitego na Sunrise yaje kuyishyura inaytsinda ibindi bibiri birangira ari 3-1, wari umunsi wa 13 wa shampiyona y’icyiro cya mbere.

Hagati mu kibuga AS Kigali na Kiyovu Sports bagerageza kwamburana umupira — Hagati mu kibuga Fitina Omborenga wa Kiyovu Sports agerageza kugumana umupira

Mu mukino wabereye kuri stade ya Kigali i Nyamirambo As Kigali yari yakiriye Kiyovu amakipe yombi abarizwa mu murenge umwe, ni umukino watangiye As Kigali irusha cyane Kiyovu kuko ku munota wa mbere AS Kigali yahise ibona igitego gitsinzwe na Sugira Erenest nyuma yo gutera ishoti rikomeye risanga umunyezamu Kassim wa Kiyovu ahagaze nabi.

Umukino wakomeje Kiyovu Sports ikomeza kugorwa cyane no kwinjira mu mukino aho umukinnyi Songa Isae yaje gutsindira ikipe ya As Kigali igitego cya kabiri ahagana mu minota 15 y’igice cya mbere.

As Kigali yari ifite inyota y’ibitego byinshi yakomeje gusatira cyane maze Sugira Erenest aza gucenga abinyuma ba Kiyovu sport bamugusha hasi maze Umusifuzi Gervais Hakizimana ahita atanga Penaliti iterwa neza na Sugira Ernest abatsinze igitego cye cya kabiri muri uyu mukino kigira icya gatatu cy’ikipe y’abanyamugi igice cya mbere kirangira ari ibitego 3-0.

Igice cya kabiri amakipe yombi yagarutse hari impinduka cyane ku ruhande rwa Kiyovu aho abakinnyi bagerageje guhererekanya umupira ngo barebe ko bishyura ibi ibitego maze Benedata Janvier umusore wanigaragaje muri iki gice cya kabiri ku ruhande rwa Kiyovu Sports atsinda igitego cyiza ku ishoti yatereye nko muri metero 25 maze umuzamu Shamiru Bate wa AS Kigali ntiyamenya uko bigenze.

Umukino wahise uba nk’uhindura isura Kiyovu irasatira ariko ba rutahizamu bayo bakomeza guhusha ibitego byinshi ari nako AS Kigali nayo yanyuzagamo ikazamura umupira ishaka gutsinda n’icya kane.

Mu minota ya nyuma y’igice cya kabiri Songa Isae yongera guterera kure ishoti rikomeye umunyezamu wa kiyovu ntiyamenya uko bigenze biba bibaye ibitego 4-1 umukino urangira gutyo.

Kuri Stade Amahoro naho hari hari kubera umukino w’ikipe ya APR FC n’ikipe ya Sunrise yo mu Buganza ni umukino igice cya mbere ikipe ya Sunrise yagerageje kwihagararaho maze ibanza igitego ikipe ya APR FC ku gitego cyatsinzwe na Nkomeje Alex hanyuma mu gice cya kabiri APR FC yaje kubona penaliti iterwa neza na Ngomarikiza Hegman atsinda igitego cyo kwishyura maze Emery Bayisenge atsinda icya kabiri ku ruhande rwa APR FC mu gihe Iradukunda Bertrand yatsindiye APR FC igitego cya gatatu,umukino urangira ari ibitego 3-1 cya Sunrise.

I Rubavu ikipe ya Marines yari yakiriye ikipe ya Gicumbi kuri Stade Umuganda umukino warangiye amakipe yombi ananiwe kwisobanura anganyje 0-0.