ADEPR yateguwe igiterane cyo guha ikaze Umwuka Wera hizihizwa Pentekote

Mu rwego rwo gukomeza guha umwanya umwuka wera mu Itorero rya Pentekote mu Rwanda ADEPR, Ururembo rw’Umujyi wa Kigali ryateguye igiterane ngarukamwaka cyo guha ikaze umwuka wera, mu rwego rwo kwizihiza umunsi mukuru wa Pentekote.

Iki giterane kizaba mu mpera z’iki cyumweru, kuwa gatandatu tariki ya 7 Kamena 2014, ku Nyubako ya ADEPR zo ku Gisozi, hafi ya Kaminuza ya ULK.

Ni igiterane kizatangira mu gitondo, Korari zitandukanye nka Hoziyana, Jehovah-Jireh n’zindi zizaturuka kuma Paruwasi atandukanye yo mu rurembo rw’Umujyi wa Kigali zivuga ubutumwa.

Muri iki giterane kandi hazaba hari n’abahanzi baririmba ku giti cyabo batandukanye, Abayobozi b’Itorero ndetse n’Abakristo bazaturuka mu bice bitandukanye by’igihugu.

Mu gihe habura iminsi micye ngo kibe, Umushumba wa ADEPR w’Ururembo rw’Umujyi wa Kigali, Rev. Pastor Rurangirwa Emmanuel, yatangaje ko bizeye neza ko hari imbaraga Imana izohereza muri iki giterane.

Yagize ati “Dushingiye ku nsanganyamatsiko y’igiterane dusanga mu Ibyakozwe n’Intumwa 1:8 ivuga ngo ‘Icyakora muzahabwa imbaraga Umwuka Wera nabamanukira kandi muzaba abagabo bo kumpamya…’ Uyu uzaba ari umunsi udasanzwe wo guhemburwa n’Imana kuko niyo yadusezeranije ko izaduha imbaraga z’Umwuka Wera.”

Rurangirwa akangurira abantu kuzitabira iki giterane ari benshi kuko ngo ubuzima n’ibihe abantu babamo ari byiza guhorana imbaraga z’Imana kugira ngo bashobore guhora bihanganishwa n’Imana kandi banesha nk’uko Pawulo. Bityo ngo umukristo wese akwiye kugira inyota yo guhora avugururwa no kuzuzwa mu buryo bw’Umwuka Wera kugira ngo ashobore guhora yambaye intwaro zose z’Imana no guhagarara adatsinzwe n’uburiganya bwa Satani (Efeso 6:11-13).

Source: Emmanuel Kwizera/ADEPR

ububiko.umusekehost.com