Uruganda FAPROBE rwadukiriwe n’inkongi y’umuriro

Ku gicamunsi cyo kuri uyu wa kane tariki ya 14 Gashyantare 2013, uruganda rwitwa FAPROBE rwadukiriwe n’inkongi y’umuriro, ariko Polisi y’Igihugu itabarira hafi ihosha iyo nkongi rutaragurumana.

Uru ruganda rukora ibikoresho bya beto (Fabrication des produits en Beton) rwahiye ruherereye mu Mujyi wa Kigali ahitwa mu gishanga usa n’ugeze ku cyapa cyo mu Kanogo cyangwa ahazwi nka “camps zaire”.

Ubwo rwashyaga abaturage bahuruye ariko ntacyo bari kubashya gukora kuko umuriro wari utangiye kuba mwinshi, icyakora Polisi y’igihugu yahageze mu minota itarenze 20 umurimo utangiye kwaka ihita iwuhosha yifashishije imodoka zayo zizimya umurimo.

Uru ruganda ruri hagati y’amazu ndetse hafi yarwo hari station ya lisansi ku buryo abantu bari bahari bemezaga ko iyo polisi y’igihugu idatabarira hafi iyi iyi nkongi yari kwadukira iyo station bikarushaho kuba bibi.

Magingo aya icyateye iyi nkongi ntikiramenyekana, ariko ababishinzwe baracyareba icyaba cyateye iyo nkongi.

Ntibiramenyakana agaciro k’ibyaba byangirikiye muri uyu muriro.

Uru ruganda ruhiye mu gihe mu mpera z’umwaka ushize, urundi ruganda ruherereye muri kariya gace rukora imifariso narwo rwadukiriwe n’inkongi y’umuriro.

Hafi hariya kandi niho inkongi yakongoye inzu y’imyidagaduro izwi cyane ya Cadillac irakongoka, nubu ikaba itarongera gukora.

Umuriro kandi  watwitse amazu y’imyidagaduro ya Orion Club i Muhanga, Dowton na Class, B-Club two muri Kigali.

Mu minsi ishize kandi aho Radio Isango Star yakoreraga (muri Saint Paul) yahimuwe n’ingongi y’umuriro nabwo polisi y’igihugu itabarira hafi ikinga akaboko inzu ntiyagurumana yose.

Iyi miriro myinshi yagiye ivugwa ku bw’amahirwe nta rubanda rurayigwamo, Polisi y’igihugu ikaba ikunda gukangurira abantu kugira udukoresho twifashishwa mu kuzimya umuriro mu gihe utaraba mwinshi.

Photos: Norbert N.

Norbert NYUZAHAYO
UM– USEKE.COM