Imihoro n’amasuka ku isonga mu guhitana ubuzima bwa benshi

Ubwo hatangizwaga ku mugaragaro icyumweru cyahariwe  ubufatanye bwa Polisi  n’abaturage  mu kubungabunga umutekano “Community Policing Week”, Umuvugizi wa Polisi y’Igihugu Supt. Theos Badege yavuze ko ibikoresho byo mu rugo birimo amasuka n’imihoro biri ku rugero rwa 80% hakorwa ibyaha by’urugomo n’ubwicanyi.

Supt. Theos Badege yagaragaje ibyaha bitanu bihora biza ku isonga buri mwaka ndetse bihangayikishije umuryango nyarwanda aribyo: gucuruza no kunywa ibiyobyabwenge, ubujura, urugomo (gukubita no gukomeretsa), gusambanya abana, no gukoresha impapuro mpimbano.

Polisi y’Igihugu ivuga ko ibyo byaha byose bihungabana umutekano w’abaturage, akaba ariyo mpamvu yiyemeje gukorana nabo umunsi ku munsi muri gahunda ya “Community Policing  kugira ngo bicike.

Umuvugizi wa Polisi y’igihugu avuga ko ubufatanye bw’abaturage na Polisi ari ingenzi cyane dore ko abaturage aribo bakunze kurangira uru rwego (polisi) ahakorewe ibyaha bitandukanye. Uretse kubarangira ahakorewe ibyaha abaturage banaburira polisi y’igihugu abakora ibitemewe n’amategeko nayo igatabarira hafi mu rwego rwo kubikumira.

Supt Theos Badege yemeza ko ubu  buryo  bwo gukora n’abaturage  bumaze kumenyerwa  nka “Community Policing”  buza ku isonga  mu gukumira ibyaha bitandukanye, kuko aribwo bwifashishwa mu gukoma imbere  abanyabyaha no kubungabunga  umutekano, akaba ariyo mpamvu  hateguwe iyi “Community Policing Week”.

Badege, yavuze ko uruhare rw’abaturage arirwo rwatumye babasha gufata abishe indaya, abishe Dr Radjabu Mbukani wakoreraga mu Bitaro Bikuru bya Kaminuza bya Kigali, abishe umucuruzi wo muri Burera witwa Habimana Sosthene, abishe umucuruzi w’umugande witwa Dickson Tinyinondi n’abandi. Ubu bufatanye kandi bwatumye hatahurwa agatsiko k’abajura bibaga muri Banki, ndetse n’abinjizaga ibiyobyabwenge mu gihugu babikuye hanze.

Ibi byashimangiwe na Minisitiri w’umutekano mu gihugu Sheikh Musa Fazil Hererimana  wavuze ko uruhare rw’abaturage n’inzego za Polisi mu bufatanye mu kubungabunga umutekano ari ingenzi kuko iyo umuturage adafite umutekano, igihugu nacyo nta mutekano kiba gifite.

Yagize ati ”Nitwe tugomba kurinda umutekano wacu,  turashimira Umujyi wa Kigali mu kurinda umutekano w’umujyi aho baguze imodoka y’irondo rifasha mu kurinda umutekano w’abaturage, ndetse n’inzego za Polisi mu kurinda umutekano w’igihugu, by’umwihariko turashimira urubyiruko uburyo rwahagurukiye kurwanya ibiyobyabwenge.”

Mu iki iki cyumweru hazakorwamo ibikorwa bitandukanye gukangurira urubyiruko kwirinda ibiyobyabwenge, gusura imiryango imwe n’imwe ifitanye amakimbirane, kurwanya ruswa, kwita ku bidukikije, gukangurira abantu kubahiriza amategeko y’umuhanda no kwirinda impanuka n’ibindi.

Photos: DS. Rubangura
Daddy Sadiki RUBANGURA
UM– USEKE.COM