Abasezerewe muri RCS basabye ko bishyurwa ibirarane by’amezi 9

Kuri uyu wa gatanu ku kicaro cy’ikigo gishinzwe imfungwa n’abagororwa (RCS) habaye umuhango wo gusezerera bakajya mu kiruhuko cy’izabukuru abagabo 23 n’umugore umwe bahoze muri uyu murimo, umuhango waranzwe no kubashimira ubwitange bagize mu kazi kabo. Nabo bishimiye umusanzu batanze ariko basaba ko bamwe muri bo bafitiwe ibirarane by’amezi icyenda babyishyurwa ntibagende bafitiwe umweenda.

Aba basezerewe ngo bajye mu kiruhuko cy’izabukuru ni abaheruka kwemezwa n’Inama y’Abaminisitiri yo mu cyumweru gishize. Ikiciro cy’aba ni abafite kuva ku mapeti ya Superintendent of Prisons kugera kuri Assistant Inspector of Prisons.

Komiseri mukuru w’urwego rw’igihugu rushinzwe imfungwa n’abagororwa George Rwigamba yabwiye aba basezerewe ko  bashimirwa cyane akazi bakoze muri RCS na mbere yaho, abizeza kugumana  ubufatanye anabasaba kujya bagira inama uru rwego kuko bafite ubunararibonye.

SP Rusa Gahima wigeze kuba umuyobozi wa Gereza ya Nyarugenge (izwi cyane nka 1930) ubu wari ukuriye ibigendanye n’imirimo nsimburagifungo (TIG) muri RCS, yatangaje ko ashima abayobozi bashya RCS ifite ko mu gihe gito bamaze yabonye batanga ikizere cyo gukomeza gutanga umusaruro mwiza.

SP Gahima yasabye ko kuba aribo ba mberebagiye mu kiruhuko cy’izabukuru bakorerwa ubuvugizi bakajya mu kiciro cya ‘Reserve forces’ za RCS bagakomeza gufatanya n’uru rwego.

SP Gahima yavuze ariko ko nubwo basezerewe muri bo hari bagenzi babo bari bamaze amezi icyenda badahembwa, asaba ko ibi birarane byabo babihabwa.

Ati “Uyu munsi dusezerewe ni tariki 19 kandi twari tugikora, uku kwezi twasaba ko twaguhembwa. Ntabwo bikwiye ko twajya hanze tuvuga ngo badusigayemo imyenda.”

Aba nibo bantu ba mbere bagiye mu kirihuko cy’izabukuru kuva uru rwego rushinzwe amagereza mu Rwanda rwashyirwaho mu 2008.

Abasezerewe ni;

1              SP           Emmanuel MISINGO K.
2              SP           Vincent MUJIJI
3              SP           Emmanuel RUKUNDO
4              SP           Gerald NTARUGERA
5              SP           GAHIMA RUSA
6              SP           Claver KAYONGA
7              SP           Michael MURARA
8              SP           John BIHINGIRO
9              SP           Emmanuel MUGISHA
10           SP           Francis MUHIZI
11           SP           Emma Marie MUKAGASORE
12           IP            David KAGANDA
13           IP            Didas KARENGIRE
14           IP            Enos MUGISHA
15           IP            Benon NSENGIYUMVA
16           IP            John MATABARO
17           AIP         Eugene KAMUGISHA
18           AIP         RWAMUNINGI Bandeko
19           AIP         Claver BUNGWE
20           AIP         Etienne RUDAHUNGA
21           AIP         MUSAFIRI Mwaminifu
22           AIP         Mathias BUHIGIRO
23           AIP         Leandre KARURANGA
24           AIP         Faustin NDUWIMANA

Jean Paul NKUNDINEZA
UM– USEKE.RW