Karongi: Yibye umwana w’imyaka 12 ngo amuzane i Kigali arafatwa

Mu mujyi wa Karongi, mu gitondo cyo kuri uyu wa gatanu umugabo w’ikigero cy’imyaka 35 witwa Mungwarareba bamufatanye umwana w’umuhungu w’imyaka 12 amaze kumukatishiriza ticket ngo amuzane i Kigali. Ababyeyi b’uyu mwana batabajwe bemeza ko umwana wabo yari yibwe.

Jeanne Uwamahoro, umukobwa ucuruza Airtime imbere y’ahategerwa imodoka za Capital Express yabonye uyu mwana ari kumwe n’uyu mugabo amenya umwana kuko asanzwe aturanye n’iwabo ahitwa mu Kabuga mu murenge wa Rubengera.

Uwamahoro yagize amakenga abonye atazi uyu mugabo umujyanye, maze ahamagara ababyeyi b’umwana ababaza niba ari bo bamwohereje kuko yari abonye asa n’ugana i Kigali.

Nyirarume w’uyu mwana ari nawe umurera ubu, yahise aza yihuta asanga umwana bamaze kumukatishiriza ticket bagiye kurira imodoka, ahita aburizamo icyo gikorwa abwira abakozi ba Capital Express ko umwana yari yibwe, Police ihita itabara.

Mungwarareba yahise afatwa, yemera ko yari ajyanye uyu mwana i Kigali i Nyamirambo.

Mungwarareba yabwiye Umuseke ko hari umugore witwa Fina w’i Nyamirambo yari amushyiriye kuko ngo abajura bamurembeje ngo ajya amusiga ku rugo.

Josue Ntawukuliryayo nyirarume w’uyu mwana ari nawe umurera yabwiye Umuseke ko uyu mwana yiga mukwa kane w’amashuri abanza, ko yazindutse aza mu kazi ke agasiga umwana atarabyuka ngo ajye kwiga.

Ati “nazindutse njya mukazi,  nari nzi ko aryamye abyuka akajya ku ishuri, sinari nzi ko uyu mugabo amufiteho gahunda nk’iyi, twabimenye  baduhuruje dusanga ari we .

Gedeon Ngendambizi Umunyamabanga nshingwabikorwa w’Umurenge wa Rubengera yabwiye Umuseke ko ababyeyi bagomba kurushaho kuba maso no kuganiriza abana bakamenya ibibazo bafite. Ndetse ngo n’igihe hari ikibabayeho bagatanga amakuru vuba.

Mungwarareba Jean D’amour we yahise ajyanwa kuri station ya Police i Rubengera.

I Kigali, Imiryango imwe n’imwe iracyakoresha imirimo yo mu rugo abana batagejeje imyaka y’ubukure, aba bana benshi baturuka mu bice by’icyaro bakabahemba amafaranga atagira icyo yabamarira.

Sylvain  NGOBOKA
UM– USEKE.RW/Karongi