Rwimiyaga: Hatashywe ibyumba 12 by’amashuri byubatswe ku ayavuye mu bukerarugendo

CHIEF EDITOR
08/04/2016

Abanyeshuri imbere y’aya mashuri yatashywe

Nyagatare – Mu mudugudu wa Gatebe, Akagali ka Karushuga mu murenge wa Rwimiyaga kuri uyu wa kane hatashywe ibyumba by’amashuri 12 byubatswe n’umusaruro ukomoka mu bukerarugendo aho 5% by’uwo musaruro bijya mu bikorwa by’iterambere hafi y’abaturiye pariki.

Abayobozi ku rwego rwa MINEDUC, Intara, Akarere na RDB bagera aha Gatebe gufungurairi shuri

Mu 2015/16 ubukerarugendo bwinjije miliyoni 318$ nk’uko bitangazwa n’ikigo gishinzwe kwihutisha iterambere RDB ari nacyo gifite ishami ry’ubukerarugendo mu Rwanda. 5% y’ariya madorari yinjijwe azashyirwa mu mishinga nk’amazi, amashanyarazi, amashuri…ku baturage baturiye za Pariki mu Rwanda.

Aha Gatebe hari hakiri ikibazo cy’abana biga bicaye munsi y’ibiti imvura yagwa amasomo akaba ahagaze kuko nta byumba by’amashuri bari bafite.

Faustin Bumbakare uyobora ishuri rya Gatebe Primary School avuga ko amashuri yari ahari yari ay’abantu bagiye biyubakira adakomeye agahora yasenyutse.

Ati “Gatebe ubu higa abana 1 914, ibi byumba bizadufasha cyane tuzabigabanya abana bigaga bacucitse cyane. Ubu hari n’umuriro uturuka ku mirasire y’izuba na One Laptop per child ubu yatugezeho.”

George Mupenzi umuyobozi w’Akarere ka Nyagatare yavuze ko RDB iki ari igikorwa cyiza bakoze ku burezi kandi banasanzwe bakora ibindi nko gufasha za Pharmacie z’amatungo, kubaka poste de Sante n’ibindi.

Ati “Ibi ni ibintu abaturage babona umusaruro wabyo kandi bikabashimisha.”

Belise Kaliza umuyobozi muri RDB ushinzwe iby’ubukerarugendo yavuze ko amafaranga y’ubukerarugendo aza yinjira mu ngengo y’imari y’igihugu (Budget) mu kubaka amavuriro ndetse n’ibindi bikorwa leta ikorera abaturage, hejuru yabyo na 5% yayo agasaranganywa mu bikorwa by’abaturiye pariki kuko ari nabo bagira uruhare mu kubungabunga izo pariki.

Kaliza ati “Uyu mwaka muri iyi gahunda twatanze miliyoni 376 mu gihe ubwo yatangiraga mu 2005 hari hashyizwemo miliyoni 42. Ni gahunda izakomeza kwiyongera buri mwaka. Ubu ni igikorwa kandi kijyanye na gahunda yo Kwita Izina ku nshuro ya 12.”

Kaliza avuga ko ibi ari ibikorwa bigamije gutuma umuntu uturiye Pariki yumva impamvu yo kubungabunga ibi byanya kuko ari ingirakamaro.

Abanyeshuri imbere y'aya mashuri yatashywe — Abanyeshuri imbere y’aya mashuri yatashywe

Umuyobozi w’ishuri rya Gatebe Primary School Bumbakare Faustin avuga ko iki gikorwa cyafashije cyane uburezi bw'abana — Umuyobozi w’ishuri rya Gatebe Primary School Bumbakare Faustin avuga ko iki gikorwa cyafashije cyane uburezi bw’abana

Olivier Rwamukwaya Umunyamabanga wa Leta muri Minisiteri y'Uburezi niwe wafunguye iri shuri kumugaragaro — Olivier Rwamukwaya Umunyamabanga wa Leta muri Minisiteri y’Uburezi niwe wafunguye iri shuri kumugaragaro

Ni ibyumba bifite n'ibindi byangombwa nkenerwa nk'ubwiherero n'ibigega by'amazi — Ni ibyumba bifite n’ibindi byangombwa nkenerwa nk’ubwiherero n’ibigega by’amazi

Aba bayobozi basuye ibi byumba by'amashuri — Aba bayobozi basuye ibi byumba by’amashuri

Ababyeyi barerera kuri iki kigo bari batumiwe

Bagaragaje kandi ibyishimo byo kuba bari kwigira ahantu hakwiye

Olivier Rwamukwaya avuga ko ari byiza kuba umusaruro uva mu bukerarugendo ugira akamaro ku baturage bakabyibonera mu buryo butaziguye

Umuyobozi w'Akarere ka Nyagatare iki ari igikorwa cyiza ku burezi — Umuyobozi w’Akarere ka Nyagatare iki ari igikorwa cyiza ku burezi

Belise Kariza avuga ko ibi bizakomeza buri mwaka kugira ngo abaturiye Parike barusheho kubona ibyiza byo kuyibungabunga

Daddy SADIKI RUBANGURA
UM– USEKE.RW

Share this:

1 Comment