Ibisigazwa by’ibikoresho byifashisha ingufu z’amashanyarazi biteye inkeke ku buzima bwa muntu

Muri iki gihe usanga abantu bashishikazwa no gutunga ibikoresho bikenera ingufu z’amashanyarazi, ariko ugasanga hari abatita ku ireme  ry’ibikoresho n’igihe  bigomba kumara bikoreshwa.

Ibi bikoresho byiganjemo ibyo mu ngo ndetse n’ibyifashishwa muri  biro, iyo bimaze gusaza cyangwa se bimaze gutakaza ubuziranenge bwabyo bigira ingaruka mbi ku buzima bwa muntu.

Ingaruka zinganjemo uburwayi bunyuranye harimo na  kanseri. Icyakora bamwe mu bashakatsi bo muri Kaminuza Nkuru y’U Rwanda, bemeza ko bishobora gusazurwa bikabyara ibindi bikoresho bishya.

Bimwe mu bikoresho bivugwa harimo ibyo mu ngo nka televiziyo, firigo kimwe n’iby’ikoranabuhanga n’itumanaho nka telephone, mudasobwa, ko igihe hatagenzuwe igihe byakorewe bigakomeza gukoreshwa kandi byararangije igihe byagenewe, bihinduka ibisigazwa bityo bikagira ingaruka mbi ku buzima bwa muntu.

Uretse ibiba bigikoreshwa kandi byarataye igihe, hari n’ibindi biba bitagikoreshwa byarajugunywe ku gasozi. Ibi nabyo,ngo n’ubwo biba bitagikoreshwa bigira uruhare mu kwangiza ubuzima bwa muntu ndetse n’ibidukikije bidasigaye.

Muri uyu mwaka ikigo cya Kaminuza Nkuru y’u Rwanda kita ku bidukikije, kwihangira imirimo n’amajyambere arambye(CEESD), cyashyize ahagaraga ubushakashatsi bwerekana ko haba ibikoresho biba bigikoreshwa kandi bishaje kimwe n’ibitagikoreshwa biba byarajugunywe kugasozi, hashyirwaho uburyo bwo kubikoramo ibindi bikoresho bishyashya.

MUGIRANEZA Theodomille, umwarimu mu ishami ry’ubumenyi bw’isi muri Kaminuza nkuru y’u Rwanda, avuga ko mu bushakashatsi bakoze bwerekana ko hakagombye kujyaho umurongo uhamye  na politike y’igihe kirekire ku rwego rw’igihugu, yo kureba uburyo ibikoresho bitakijyanye n’igihe byafatwa neza.

MUGIRANEZA Ati:″ikindi n’uburyo bakwiye gushaka ahantu habugenewe, kuburyo hagenwa uburyo bw’ikoranabuhanga mu gutunganya ibyo bikoresho biba bishaje.″

Bitewe n’ibyo ibi bikoresho biba bikoze, bishobora kugira ingaruka zinyuranye ku mubiri w’umuntu. KAGISHA Veadaste, umwarimu mu ishami ry’ubuvuzi bw’abantu muri Kaminuza Nkuru y’u Rwanda, avuga ko hari ibigira ingaruka ku bwonko cyane cyane ku bana.

Ingaruka ku maraso kuburyo bishobora kuvamo zimwe mu ndwara z’umwijima  ndetse n’impyiko. Mugihe ibikoze ibi bikoresho kandi byinjiye mu mubiri, bimuviramo kanseri cyangwa n’uruhu rukaba rwakwangirika.

Urugero n’inkibikoresho bikoze muri Cadimium. Iyo umubiri ufashwe nabyo, ukaba wakwinjirwamo na garama icyumi(10g), KAGISHA Veadaste avuga ko bisaba imyaka 30 kugira ngo kimwe cya kabiri kibe cyava mu mubiri w’umuntu.

Icyakora n’ubwo ibi bikoresho bishaje bigira ingaruka ku mubiri ndetse n’ibidukikije, urubuga rwa internet www.eco-info.org, rugaragaza ko ibisigazwa bikomoka ku bikoresho bikoze mu byuma bishobora kuzaba nk’amabuye y’agaciro mu bihe bizaza.

NGENZI Thomas
UM– USEKE.COM