Nta we ukwiye gucibwa intege no kuba umukobwa ahubwo yabibyaza umusaruro – Miss Jane

Mu karere ka muhanga abakobwa biga mu kigo cy’amashuri cya Ecole Technique Sainte Trinite ubwo basurwaga na nyampinga w’umuco, Umutoni Jane yababwiye ko badakwiye gucibwa intege no kuba ari abakobwa, ahubwo ngo babibyaza umusaruro.

Nyampinga w’umurage muri gahunda yo gukundisha urubyiruko kumenya umuco nyarwanda kandi bakanawubyanza inyungu, yaganiriye abakobwa biga muri Ecole Technique Sainte Trinite ababwira ko ibintu byose biza buhoro buhoro.

Umutoni Jane, Miss Héritage yagize ati “Burya nta muntu uryama ngo ahite agera ku cyo yifuza ahubwo aragiharanira, kandi akirinda gucika intenge, iryo ni ryo banga nanjye nakoresheje.”

Yasabye aba bakobwa gukoresha impano bafite bayibyaze umusaruro kandi bakoresha n’ubwenge bwabo bafite, no guha agaciro amasomo yabo.

Yagiriye inama abakobwa yo kuba ibyo bakora byose bitagomba kubatwara ubwenge ngo usange bibabuza kugira icyo bageraho.

Yababwiye ko batagomba gucibwa intege no kuba ari abakobwa, ko ahubwo babibyaza umusaruro kuko amateka y’u Rwanda yahindutse, umwana w’umukobwa ngo akaba atakiri wa wundi ufungiranwa mu nzu, agomba na we kwitekerereza akareba imbere he heza kandi hafite icyerekezo.

Umwe mu bana yabwiye nyampinga ko aramutse abanye Nyampinga w’Umurage yakora koperative y’abakobwa bagateza imbere umuco nyarwanda, cyane cyane agashyiramo abatarageze mu ishuri abarinda kwiyandarika kandi bikaba n’inzira yo kwiteza imbere kuri bo.

Josiane UWANYIRIGIRA
UM– USEKE.RW