Mukura yatsinze AS Kigali 2-0, ihita ifata umwanya wa mbere

Mukura Victory Sports yatsinze ikipe ya AS Kigali mu mukino w’umunsi wa 13 wa shampiyona y’icyiciro cya mbere, ihita ifata umwanya wa mbere ku rutonde rw’agateganyo.

Ni mu mukino wabereye kuri sitade ya Kigali i Nyamirambo kuri uyu wa gatatu, wahuzaga Mukura y’umutoza Okoko Godfroid na AS Kigali ya Eric Nshimiyimana.

Ibitego bibiri  bya Ndayishimiye Christophe ku munota wa 12 na Muhadjili Hakizimana ku munota wa 41 w’umukino, ni byo byafashije ikipe ya Mukura VS gutsinda AS Kigali.

Mukura yakinnye umukino mwiza kurusha AS Kigali, ihererekanya neza cyane kandi inagerageza andi mahirwe atandukanye yo gutsinda.

AS Kigali yagerageje gutsinda ikoresheje imipira yo hejuru kubera abasore barebare nka Akili Mabura Jean Pierre na Amini Mwizerwa ndetse na Yusuf Ndayishimiye bita Kabishi ariko birabananira kubera abugarira ba Mukura bahagararaga neza kugeza umukino urangiye.

Gutsindwa kwa AS Kigali byayihagarikiye umuvuduko kuko yari itaratsindwa umukino n’umwe muri shampiyona ya 2015/2016. Mukura VS yahise ifata umwanya wa mbere by’agateganyo irusha ikipe ya AS Kigali inota rimwe.

Abakinnyi babanjemo ku mpande zombi:

AS Kigali: Bate Shamiru, Hamdan Bariyanga, Ndaka Frederic, Soter Kayumba, Bishira Latif, Akiri Mabura Jean Pierre (C), Murengezi Rodrigue, Ndayisaba Hamidou, Cyubahiro Janvier, Amini Mwizerwa, Twizerimana Onesime.

Mukura VS: Mpazimpaka Andre (C), Zagabe Jean Claude, Ndayishimiye Celestin, Shyaka Philbert, Hakizimana Alimansi, Ndayegamiye Abou, Niyonzima Ali, Hakizimana Muhadjili, Ndayishimiye Christophe, Cyiza Houssein, Habimana Youssuf.

Roben NGABO
UM– USEKE.RW