Matchday11: AS Kigali irajya i Bugesera, Rayon yakire Muhanga

Kuri uyu wa kabiri harakomeza umunsi wa 11 wa shampiyona y’icyiciro cya mbere mu mupira w’amaguru mu Rwanda, ikipe ya AS Kigali iyoboye shampiyona yerekeza mu Bugesera naho Rayon Sports ya kabiri irakira AS Muhanga kuri stade ya Kigali.

Ku wa gatanu w’icyumweru gishize AS Kigali yatsinze biyigoye ikipe ya Marines FC igitego kimwe ku busa cya Sugira Ernest ku munota wa 6. Byafashije iyi kipe y’abanyamugi gukomeza kuyobora urutonde rwa shampiyona n’amanota 24, ikaba itaratsindwa umukino n’umwe.

Kuri uyu wa kabiri iyi kipe irerekeza i Nyamata gusura Bugesera FC ihagaze ku mwanya wa 12 n’amanota 10 gusa.

Rayon Sports ya kabiri, iraza kuba yakira AS Muhanga kuri stade ya Kigali i Nyamirambo.

Rayon irakina idafite Munezero Fiston ufite amakarita abiri y’umuhondo naho AS Muhanga yo irakina idafite Bokota Labama rutahizamu iherutse kugura wahoze akinira Rayon Sports, kuko atarabona ibyangombwa byuzuye.

Umutoza mukuru wa Rayon sports Jacky Ivan Minaert amaze kudutangariza abakinnyi 11 aza kubanzamo. Aba ni: Ndayishimiye Eric Bakame, (ba myugariro) Niyonkuru Djuma Radjou, Imanishimwe Emmanuel, Tubane James, Manzi Thierry, (abo hagati) Niyonzima Olivier Sefu, Fabrice Mugheni, Muhire Kevin, Nshuti Dominique Savio, (ba rutahizamu) Manishimwe Djabel na Ismaila Diarra.

Mu yindi mikino ikomeye iza kuba kuri uyu wa kabiri harimo ‘derby’ (umukino uhuza amakipe yo mu mugi umwe) i Rubavu, Marines FC yakira Etincelles kuri stade Umuganda.

Marines yatsinzwe na AS Kigali ku munsi wa cumi wa shampiyona igitego kimwe ku busa naho Etincelles itsindwa na Musanze ibitego 3-0.

Urutonde rw’agateganyo rwa shampiyona:

1 AS Kigali 24 pts
2 Rayon Sports 21 pts
3 Mukura 20 pts
4 APR 18 pts
5 Police 17 pts
6 Kiyovu Sports 14 pts
7 Gicumbi 14 pts
8 Amagaju 13 pts
9 Musanze 12 pts
10 Sunrise 11 pts
11 Espoir 10 pts
12 Bugesera 10 pts
13 Rwamagana City 8 pts
14 Marines 7 pts
15 Etincelles 6 pts
16 Muhanga 2 pts

Roben NGABO
UM– USEKE.RW