Mashami ashobora kugirwa umutoza w’Amavubi U20

Nyuma yo guhagarikwa ku mirimo yo kuba umutoza wungirije w’Amavubi, Mashami Vincent ashobora guhabwa ikipe y’igihugu y’abatarengeje imyaka 20, izakina na Uganda mu mikino yo gushaka itike y’igikombe cya Afurika 2017 kizabera muri Zambia.

Vincent Mashami yahagaritswe ku kazi ko kungiriza umutoza mukuru Johnny McKinstry, nyuma ya CECAFA 2015, yabereye muri Ethiopia. Aha, u Rwanda rwageze ku mukino wa nyuma, ruhatsindirwa na Uganda Cranes.

Uyu mutoza ashobora kubonerwa inshingano nshya. Amakuru agera k’Umuseke aremeza ko ishyirahamwe ry’umupira w’amaguru mu Rwanda FERWAFA, ryasabye ko uyu mutoza yazaba ariwe utoza ikipe y’igihugu y’abatarengeje imyaka 20, mu mikino yo gushaka itike ijya mu gikombe cya Afurika cy’abatarengeje imyaka 23.

Umuseke wagerageje kuvugana n’umuyobozi wa FERWAFA kuri aya makuru ariko inshuro zose twagerageje kuvugana nawe ntibyashobotse.

Ibi bigaterwa n’uko umutoza mukuru w’Amavubi, Johnathan McKinstry, bitashoboka ko atoza iyi mikino y’abato kuko umukino wa Uganda U20, uzaba nyuma y’iminsi itanu gusa Amavubi makuru avuye muri Mauritius mu mikino yo gushaka itike y’igikombe cya Afurika cy’abakuru 2017 kizabera muri Gabon.

Tariki 8 Ukwakira 2015 nibwo Mashami Vincent yahawe amasezerano y’imyaka ibiri na MINISPOC nk’umutoza wungirije w’Amavubi.

Bidateye kabiri, umutoza mukuru Johnny McKinstry amuhagarika amushinja kudakora ke neza ko kumufasha no kumwunganira. Bityo Mashami yari amaze abiri adakora, kandi atarirukanywe, ndetse amasezerano ye atarasheshwe.

Bikaba bivugwa ko FERWAFA yasabye MINISPOC ko uyu mukino wa Uganda U20, Mashami Vincent yawutoza, yungirijwe na Ruremesha Emmanuel usanzwe atoza Gicumbi.

Roben NGABO
UM– USEKE.RW