U Rwanda rwatomboye Uganda mu gushaka itike ya CAN U23

Mu ntangiriro za Mata 2016, Amavubi y’u Rwanda azahatana na Uganda mu majonjora y’imikino yo gushaka itike ya CAN u23 izabera muri Zambia muri 2017.

U Rwanda rwatomboye Imisambi ya Uganda mu mikino ikinwa n’abatarengeje imyaka 20 kubera ko batangira amajonjora imyaka ibiri mbere y’imikino ya nyuma. Ubu hari ijonjora ry’ibanze ryabaye umwaka ushize u Rwanda rutagiyemo rukaza muri iki kiciro kindi.

Hagati ya tariki ya mbere n’iya gatatu Mata 2016, nibwo hateganyijwe umukino ubanza uzahuza impande zombi.

Ubwo u Rwanda ruheruka guhura na Uganda mu mikino y’abato, hose rwarasezerewe.

Mu 2014 Uganda Craines yasezereye Amavubi y’abatarengeje imyaka 17, iyanyagiye ibitego 7-2 mu mikino yombi. Abenshi mu bakinnye uyu mukino, bashobora kongera guhura muri Mata uyu mwaka.

Umwaka ushize 2015 nabwo, Uganda yasezereye u Rwanda mu batarengeje imyaka 23 bahataniraga itike yo kujya mu mikino Olimpike, ku giteranyo cy’ibitego 4-1 mu mikino yombi.

Amavubi akaba afite akazi gakomeye ku guhindura aya mateka mabi imbere ya Uganda mu ngimbi.

Igikombe cya Afurika cy’abatarengeje imyaka 23 giheruka cyabereye muri Senegal gitwarwa na Nigeria, u Rwanda ntirwashoboye kugera yo kuko rwasezerewe na Gabon mu majonjora.

Roben NGABO
UM– USEKE.RW