Rutahizamu mushya wa Rayon Sports Ismaila Diarra yerekanywe

Kuri uyu wa gatatu tariki ya 10 Gashyantare 2016 nimugoroba nibwo rutahizamu mushya wa Rayon sports, umunyaMali Ismaila Diarra yaretswe itangazamakuru, binemezwa ko azagaragara ku mukino wa Gicumbi ku munsi wa 10 wa Shampionat nisubukurwa.

Shampiyona y’u Rwanda biteganyijwe gukomeza kuri uyu wa gatanu. Rayon sports izaba yerekeza i Gicumbi.

Iminsi ibiri mbere y’uyu mukino, Rayon sports yateguye ikiganiro n’abanyamakuru, kitabiriwe n’umunyambanga wayo Olivier Gakwaya n’umutoza Ivan Jacky Mineart, kapiteni Jean Luc Ndayishimiye bita Bakame.

Mu kwerekana uyu mukinnyi umutoza Jacky Mineart yatangaje ko ari we wamwirambagirije.

Mineart yagize ati “Uyu rutahizamu twarabanye ndamuzi. Namutoje amezi atandatu muri Sporting Club Djoliba muri Mali. Ntabwo ari rutahizamu utsinda gusa, ahubwo anafasha mu mukino rusange w’ikipe. Simuzanye ngo asimbure Devis (Kasirye) ahubwo ni uwo bagomba guhanganira umwanya.”

Davis Kasirye we ntabwo aranagera mu myitozo. Aheruka muri Rayon mu gushyingo 2015.

Nkuko Umunyamabanga wa Rayon sports yabitangaje, uyu rutahizamu w’umugande yamaze guhagarikwa kubera imyitwarire mibi.

Kapiteni wa Rayon Sports Jean Luc Ndayishimiye yatangaje ko nubwo hari ibyo komite igomba bagenzi be itarabaha (imishahara), ngo umwuka ni mwiza kandi biteguye umukino wa Gicumbi.

Bakame yagize ati “Bamaze kuduha ukwezi kumwe. Kandi n’ayandi batwijeje ko bazayaduha mbere y’umukino wa Gicumbi. Ikipe dukinira turayizi tuzi ko nta handi Rayon ikura, ni mu bafana gusa kandi amezi abiri arashize nta mukino dukina ngo twegere abo bafana. Ibyo rero ntibyaduca intege, twe turiteguye, Gicumbi itwitege.”

Uyu rutahizamu mushya wa Rayon sports, yanze kugira byinshi atangariza itangazamakuru, kuko ngo nta byinshi azi kuri ruhago y’u Rwanda.

Gusa ngo icyo yijeje abafana ba Rayon sports, ni ukubafasha gutwara igikombe cya shampiyona, kuko ngo niyo ntego yasanze mu ikipe.

Umutoza we yasabye abanyamakuru ko iminsi ibiri mbere ya buri mukino, yazajya ahura n’itangazamakuru, bikaba mu buryo buhoraho, akaba ari naho azajya atangariza abakinnyi 18 azakoresha.

Ku mukino wa Gicumbi, Rayon sports abakinnyi 18 izakoresha ni :

Ndayishimiye Jean Luc Bakame ,Munezero Fiston, Manzi Thierry, Mugenzi Cedric, Tubane James, Muhire Kevin, Manishimwe Djabel, Niyonkuru Vivien, Imanishimwe Emmanuel, Fabrice Fabrice, Ndacyayisenga Alexis, Nsengiyumva Moustapha, Niyonzima Olivier Sefu, Mugisha Francois Matser, Gahonzire Olave, Nshuti Dominique Savio, Bashunga Abouba na Ismaila Diarra

Rayon sports izakina na Gicumbi kuri uyu wa gatanu tariki 12 Gashyantare 2016, kuri stade ya Gicumbi.

Roben NGABO
UM– USEKE.RW