Basketball: Patriots yatsinze Espoir mu mukino wari wahuruje imbaga

Ku mugoroba wo kuri uyu wa gatanu hakinwe umukino umwe w’umunsi wa kane wa shampionat ya Basketball mu Rwanda, wari umukino witezwe cyane n’abakunzi ba Basketball mu Rwanda aho hagati ya Patriots na Espoir BBC iyari butsinde yari gufata umwanya wa mbere. Patriots niyo yabigezeho itsinda 77 kuri 65 y’ikigugu Espoir.

Mu mateka nibwo bwa mbere iyi kipe ya Patriots itsinze itaramara igihe kinini mu Rwanda itsinze Espoir mu mukino wa shampionat. Muri uyu mukino nta na rimwe Espoir yigeze ijya imbere ya Patriots.

Patriots yabifashijwemo na Kapiteni wayo akaba na ‘meneur de jeux’ Arstide Mugabe bavanye mu minsi ishize muri Espoir yari abereye Kapiteni, uyu munsi iyi kipe yavuyemo yayitsinze amanota 21 wenyine, anatanga imipira imwe n’imwe yavuyemo ibitego.

Espoir y’umutoza Valerie wigeze kuyikinira igihe kinini, nta na rimwe yigeze ijya imbere mu manota Patriots mu mukino wose, nubwo bwose ikipe zombi zakomeje gukomeza kwegerana mu manota uko umukino wagiye uzamuka.

Ali Kubwimana wa Patriots yakoze akazi gakomeye cyane mu kugarira no kuzamura amanota y’ikipe ye.

Ku ruhande rwa Espoir Olivier, Lionel Hakizimana na Bienvenue Ngandu bari bitezweho byinshi ariko ntabwo byabakundiye neza kuko Patriots yakomeje kubagenda imbere ubwo bo hari amanota bahushaga.

Ni umukino wari wahuruje imbaga, stade amahoro (petit stade) yari yuzuye hafi yose, bitangaje Patriots yari ifite abafana benshi bidasanzwe kandi bafite umurindi udacogora, aba Espoir bo bafanaga ari uko gusa ikoze akantu.

Uyu mukino warangiye Lionel Hakizimana wa Espoir ari we utsinze amanota menshi, 28Pts, akurikirwa na Aristide Mugabe bakinanaga ariko ubu uri muri Patriots watsinze amanota 21.

Patriots yahise ifata umwanya wa mbere ku rutonde rw’agateganyo rwa shampionat ya Basketball mu Rwanda.

Jean Pierre NIZEYIMANA
UM– USEKE.RW