Perezida Kagame yashimiye Amavubi, avuga ko hari bike byo gukosora

Yirebeye umukino w’Amavubi na Cote d’Ivoire kuwa gatandatu, kimwe n’abandi banyarwanda benshi yishimiye intsinzi y’Amavubi ndetse anayashimira uko yitwaye nyuma yo gutsinda Cote d’Ivoire kimwe ku busa. Gusa avuga ko hari bimwe byo gukosora kandi bishoboka.

Afungura aya marushanwa, Perezida Kagame wari wazanye na Mme Jeannette Kagame ndetse n’umukobwa wabo Ange Kagame, yavuze ko ahaye ikaze ibihugu 15 byaje mu Rwanda kurushanwa muri iri rushanwa nyafrica riri kuba ku nshuro ya kane.

Imbere y’imbaga y’abasaga ibihumbi 26 (nkuko tubikesha ikigo gishinzwe gucuruza amatike no kwinjiza ku masitade), Amavubi yabashije kwihagararaho ku gitego kimwe wari watsinze kare, Inzovu ntizakishyura, ni mu mukino utari ku rwego rushimishije kuko amakipe yombi nta buryo bwo gutsinda bwiza yabonye ndetse nta no guhanahana no gucengana byiza abafana babonye.

Umukino urangiye ku ntsinzi y’Amavubi, Perezida Kagame abicishije kuri Twitter yashimiye ibyo Amavubi yakoze kuri uyu mukino itangira.

Amavubi azakina umukino utaha na Gabon kuri uyu wa gatatu tariki 20 Mutarama 2016 saa 15h, kuri stade Amahoro.

Roben NGABO
UM– USEKE.RW