Victoria: Ubwato burimo abantu 200 bwibiranduye nyuma yo kugongana n’ubundi

Hari ubwoba ko abantu benshi baba bahitanywe n’impanuka y’amato abiri yagonganye mu ijoro ryo kuri uyu wa kabiri hagati y’ibirwa bya Kiwa na Remba mu kiyaga cya Victoria. Bumwe bwari butwaye abantu bagera kuri 200 bwibiranduye nk’uko bitangazwa n’ikinyamakuru Nation cyo muri Kenya.

Ubwato bumwe ngo bwari butwaye abarobyi bava ku kirwa cya Remba berekezaga ku isoko mu gace kitwa Migori mu burasirazuba bwa Kenya.

Hari amakuru avuga ko abantu icyenda aribo bahise bahasiga ubuzima.

Umuyobozi wa Police mu gace ka Migori ariko avuga ko abana babiri aribo bonyine bapfuye.

Imibare y’abaguye muri iyi mpanuka ishobora kuza kwiyongera uko amasaha akura.

UM– USEKE.RW